(sursilvan) Plattafuormas digitalas dattan tut per survegnir noss’attenziun, nies temps e nos sentiments. Ellas vulan influenzar tgei che nus legin, vesin, patertgein e decidin.
Nus vegnin strusch pli suenter a quei svilup rasant dall’intelligenza artificiala. Grev da capir quella cumplexitad e tut las pusseivladads. Tgei ei relevant – e tgei buc? Tgei ei real, ver e nunsfalsificau? E tgei illusiuns, manzegnas e «fakes»? Nossa fidonza en medias e plattafuormas vegn messa sill’emprova.
Quei ei nuota in motiv da recapitular. Mintg’epoca ha sias sfidas e pretenda novas habilitads. La gronda sfida cull’intelligenza artificiala ei segir la spertadad dil svilup e la cumplexitad. Ei dat negin anavos – mo pli e pli spert anavon.
Pli digitals ch’il mund vegn e pli impurtont eis ei dad esser pertscharts che mintgin da nus sto surprender responsabladad co el ni ella va entuorn cun il consum da medias. Tgei plattafuormas, tgei purschidas, tgei contribuziuns eligin e sustenin nus? Tgei fa bein a nus e tgei buc? Ord mia vesta secloma la resursa ch’ei ussa relevanta «Selbstwirksamkeit». Esser sez effectivs – prender sez enta maun las hottas ed esser pertscharts: Jeu hai la letga.
Tgei ei relevant – e tgei buc? Tgei ei real, ver e nunsfalsificau? E tgei illusiuns, manzegnas e «fakes»? Nossa fidonza en medias e plattafuormas vegn messa sill’emprova.
Per mei persunalmein vul quei dir concret da reflectar e star attenta: Tgei fan tut quels cuntegns e quellas informaziuns cun mei – cun miu intern? Tgi sun jeu – senza far il «scrollen» tras miu telefonin, senza la renconuschientscha entras likes e commentaris? Tgi sun jeu propi e tgei ein mias valurs e mes basegns? Ord quella vesta saiel jeu lu decider sezza, tgei e con ch’jeu vi consumar e con fetg ch’jeu laschel tier l’influenza sin miu meini e mia tenuta.
Jeu decidel sezza, tgei che survegn mi’attenziun e con temps ch’jeu investeschel el mund digital. Jeu sun buc exponida e senza pussonza. Negin sforza mei da consumar ils cuntegns sin las plattafuormas.
Clar, era tier mei dat ei muments ch’jeu sepiardel ellas medias digitalas per lu, in’ura pli tard sedumandar: Nua ei quei temps ius e tgei ha quei uss grad purtau a mi?
Jeu sun denton pertscharta e sensibilisada ch’jeu hai la responsabladad per mei. Ed jeu mon entuorn sensitivamein cun la schelta dils cuntegns – e cun il temps ch’jeu investeschel.
Jeu hai la letga – adina puspei – di per di. E quei ei in grond privilegi.