Ils 22 d’uost vegn seregurdau sin gl’entir mund dallas unfrendas muort violenza ord motivs religius ni da cardientscha. Quest di internaziunal ei vegnius proclamaus per l’emprema gada ils 22 d’uost 2019 dall’UNO.
«En in mund nua che differentas fuormas d’ina tirannia moderna emprovan da sbassar la libertad religiusa, senza dretg da vuschar, sin ina subcultura. Nua che la religiun vegn surduvrada sco stgisa per odi e brutalitad eis ei necessari che aderents da diversas tradiziuns religiusas aulzan ensemen la vusch per la pasch, la toleranza, per la dignitad dil carstgaun, e pretendan respect per ils dretgs d’in e scadin.» Aschia di il papa Francestg!
Mo co eis ei vegniu tier quei di commemorativ, il qual tolerescha buca pli la violenza ord motivs religius? Atras ina iniziativa dils Stadis Uni, la quala ei beinspert era vegnida sustenida dad autras tiaras oravontut era da l‘Uniun Europea. Quella allianza internaziunala per la libertad religiusa ha giu effect che en Danemarc, Hollanda, Stadis Unis da l'America, Norvegia, Finlanda, Pologna, en la Gronda Britannia ed en la Germania eis ei vegniu elegiu in ambassadur per la libertad religiusa. Deplorablamein en Svizra tochen oz aunc buca.
Cheu setracta ei d’in svilup, il qual ei sederasaus dapi tschentaners cun ragischs che sebasan sin l’intoleranza, la discriminaziun e che sederasan tochen la persecuziun.
Malgrad tut quels sforzs laian ils resultats piarder empau l’euforia. Retschercas pretendan che dus tiarzas dalla populaziun mundiala vegn sin ina moda ni l‘autra en contact cun la violaziun dils dretgs dalla libertad religiusa. Entgins schizun en fuorma da persecuziun. En connex cul cristianissem vegn numnau la cefra da 200 milliuns cristians che vegnan persequitai sil mund. Sche nus focussein mo per exempel sin la China ed il Myanmar, nua ch’er il pievel dils Rohingya ed ils Uigurs vivan, savein nus dir che 30 milliuns muslims vegnan era persequitai.
Ei quei per nus ina surpresa? – Na propi buc, cheu setracta ei d’in svilup, il qual ei sederasaus dapi tschentaners cun ragischs che sebasan sin l’intoleranza, la discriminaziun e che sederasan tochen la persecuziun. Cun ina expertisa da 800 paginas analisescha l’organisaziun «Baselgia en miseria» en siu rapport sur dalla libertad religiusa en detagl la situaziun da 196 tiaras. Quei ei per interessents ina lectura cumplexa.