Eu n’ha guardà our da fanestra e n’ha vis cha’ls flocs da naiv nu crodaivan da suringiò, dimpersè svolaivan insü. I paraiva ch’els svolessan da la terra amunt sü vers il tschêl.
(vallader)
Avant ün pêr dis haja naivü. Quai nu tuna forsa tant straordinari. Ed Ellas ed Els pensaran cha quai saja bain tuot normal, schi naiva. Impustüt in december.
Ma i d’eira listess ün pa special, perquai chi ha naivü amunt. Eu n’ha guardà our da fanestra e n’ha vis cha’ls flocs da naiv nu crodaivan da suringiò, dimpersè svolaivan insü. I paraiva ch’els svolessan da la terra amunt sü vers il tschêl. Eu sun i oura sün via e n’ha constatà cha’ls flocs nu sun be svolats amunt, dimpersè eir vi e nan e sü e giò, e giò e sü ed in tuottas direcziuns.
Quai am paraiva listess fich special e m’ha dat da pensar. Minchatant capitan amo robas tuot insolitas, minchatant capitan amo miraculs, n’haja pensà. Ma la dumonda es, sch’eu sun pront e capabel da tils verer. La dumonda es, sch’eu sun pront da crajer quai ch’eu vez e resaint. La dumonda es, sch’eu sun pront da laschar pro nouvas experienzas, sch’eu sun pront da m’imaginar chi pudess capitar alch tuottafat nouv in mia vita.
Suna avert avuonda per pudair dudir nouvas robas our da la bocca da mia partenaria o da meis partenari? Esa pussibel ch’eu am lascha amo surprender dad ün’amia o dad ün collega, uschè ch’eu vezzess üna vart cumplettamaing nouva vi dad ella o vi dad el? Ed esa forsa pussibel, ch’eu saja uschè avert ch’eu possa dafatta esser per mai svess üna surpraisa? Ch’eu pensa robas ch’eu nun ha amo mai pensà? Ch’eu fetscha alch ch’eu nun ha amo mai fat? Ch’eu sainta alch ch’eu nu na amo mai senti?
Avant ün pêr dis haja naivü. Vairamaing tuot normal in december. Ma quista jada alch fich straordinari. Id ha nempe naivü amunt. Id ha naivü da schnestra a dretta e da dretta a schnestra ed eir diagonal ed aval ed amunt ed in tuottas direcziuns.
Avant ün pêr dis d’eira Nadal. I dischan cha Dieu svess saja nat in ün poppin. Suna pront e capabel ed avert avuonda da crajer quai?
