Pled sin via - «Mirar anavon ni anavos?»

(sursilvan) Las biaras pleivs catolicas pon ver absolviu lur perdanonzas per uonn. Ellas han pia tenor usit embelliu la baselgia, han fatg in survetsch divin festiv ed ein semessas cun sogns, reliquias e cafanuns en processiun tras il vitg. El meglier cass han musica e chor accumpignau la fiasta. Quellas perdanonzas leventan meinsvart regurdientschas dall’affonza e da temps vargai.

Da pign mavel jeu mattei en processiun suenter las combas da mia mumma. Cu jeu sun lu vegnius en scola, era ei dad ir davontier en processiun, gest suenter il cafanun grond, ni sco nus schein, suenter la sontga crusch gronda. Lu, cu jeu sun vegnius ord scola, ha ei giu num da far parada ils proxims onns. Pér pli tard sun jeu puspei turnaus tier la sontga crusch, naven da lu eis ei denton stau da purtar ella.

Cheu sun jeu pliras gadas sedumandaus: Co tegn ins atgnamein quella sontga crusch? Jeu sun s’orientaus vid il caluster d’avon onns e tegn ella aschia che l’asta va ordavon ed il maletg penda davos giu. Il maletg dalla fiasta ei pia viults encunter la processiun. Auters tegnan la sontga cursch gest il cuntrari. Quei che fa forsa megliera pareta per aspectaturs sper via e sin fotografias. Denton ein omisduas modas da purtar documentadas, era sin fotografias veglias.

Jeu hai mai entschiet ina discussiun, tgei che fuss endretg ni falliu. Ils ins pon ver in meini pli decidiu. Jeu crei denton ch’ins sa argumentar aschia ni aschia. Miu patratg ei ch’il maletg dalla sontga crusch duei esser veseivels en emprema lingia per quels che suondan en processiun. Lezs san mirar anavon e vesan tal maletg.

El medem mument stoi jeu conceder ch’els miran era anavos, els miran gie sin maletgs vegls e sin usits vegls. Mo co vesess ei o sche nus empruassen da mirar pli anavon? Co vesessen nossas perdanonzas lu o? Sche nus anflassen novas fuormas per nossas perdanonzas che fagessen la punt el temps dad oz. Ha enzatgi inaga fatg tals patratgs? Forsa fuss ei uras.