(sursilvan) En mia veta professiunala ei il tema «religiun» fetg presents: jeu hai studegiau scienzia da religiun e lavurel oz egl institut da scienzia da religiun all’universitad a Turitg. Pervia da mia professiun vegnel jeu savens dumandada, sch’jeu mezza sun era religiusa. Sche jeu hai buca schi gust dad explicar dapli, lu ei mia risposta il bia semplamein «na». Quei tuna lu sco sch’ei fuss sempel e clar. Aber aschia eis ei buca. Quei «na» ei il resultat da ponderaziuns e dubis sur plirs onns. Quei «na» vul era buc dir che quei process ei a fin. Jeu legel adina puspei da differents concepts ni ideas religiusas e spiritualas che fascineschan mei e provocheschan novs patratgs.
Ch’ei dat negin senn universal munta per mei buca ch’ins sa menar ina veta che ha neginas valurs eticas.
Grad avon in pèr jamnas ha ina buna amitga raquintau a mi dil nihilissem positiv. Quella noziun ha fatg marveglias. Il nihilissem enconusch’ins il bia sco ina filosofia plitost pessimistica; ina filosofia che dat buca biara speronza. Jeu hai giu quell’idea in tec dramatica da nihilists e nihilistas sco persunas ch’ein bunamein en ina desperaziun perquei ch’ellas crein che la veta hagi negin senn. Sa il nihilissem insumma esser positivs? Ei quei buca ina cuntradicziun?
Jeu hai lu fatg in «deep dive», also ina retscherca intensiva, sin Google sur da quei tema ed hai anflau ina filosofia che plai a mi. Nihilistas positivas crein era buca vid in senn dalla veta, mo vesan quei buca sc’in manco, ma sco schanza da crear lur agen senn persunal.
Per mei ha quella idea in effect liberont. Jeu hai ei enta maun da crear miu agen senn dalla veta enstagl da tschercar quel zanuas auter ni spitgar sin x in segn che muossa a mi pertgei che nus essan sin quest mund. Ch’ei dat negin senn universal munta per mei buca ch’ins sa menar ina veta che ha neginas valurs eticas. Il nihilissem positiv ei per mei in’idea ch’empermetta creativitad, da prender l’iniziativa e da s’occupar cun las atgnas valurs.
Era sche miu «deep dive» en quei tema munta buca ch’jeu sun ussa ina nihilista positiva, eri tuttina in’inspiraziun da reflectar certs aspects da mia veta: Tgei ei il pli impurtont per mei? Tgei aspects da mia veta less jeu priorisar? Co sai jeu dar a mia veta in senn fetg individual? Tschentar quellas damondas regularmein e lu forsa era midar certs aspects ella veta sco consequenza: jeu sun perschuadida che quei sa meglierar la qualitad dalla veta; ed il nihilissem positiv sa cheu funcziunar sco inspiraziun.