Siglir tar il cuntegn

Header

audio
Pled sin via
Or da Vita e cretta dals 15.09.2022.
laschar ir. Durada: 2 minutas 55 Secundas.
cuntegn

Pled sin via Musicist el sutterren

Gliendisgis endamaun, tier ina staziun da metro a Washington. Duront che biars ein sin via per ir alla lavur, suna in musicist leu sper la metro in pèr tocs da Bach. Tgei cuntrast. Mo strusch enzatgi che pren notizia da quel che suna cun tutta premura la gegia.

Exact quei ei schabegiau avon zacons onns e fuss buca d’impurtonza, sch’ei fuss buca stau in dils pli renomai violinists che ha sunau leu. Quella episoda ei stada part d’in experiment social. Co reagescha la glieud, sch’ella vegn confruntada cun ina persuna renomada en in liug nunspitgau? Vegn enzatgi ad encorscher il talent dil musicist, era sch’ins ei sin via alla lavur, en prescha e cun bia auter el tgau? Igl experiment ha mussau, che mo singuls ein stai eri ed han priu peda per tedlar. Ed aschia han ils biars munchentau quei concert extraordinari.

Nus seschein tgunsch influenzar dalla massa. Jeu manegel che quei succeda era ellas medias socialas. Quei che vegn valetau cun massa polischs ensi ni engiu, quei sveglia nossa attenziun. La massa garantescha denton buca, ch’ei seigi era zatgei bien e da qualitad.

Enstagl da cuorer suenter alla fuola da glieud, seschar en era sin auters meinis e tuns. Ei savess esser ch’ins scuviera gest lu zatgei remarcabel.
Autur: Anja Felix-Candrian Plevonessa

E tuttina, con spert capeta ei che nus suandein in meini, perquei ch’enzatgi sa tschintschar bein ni perquei ch’enzatgi ha bia fans. Ni che nus entschevein a categorisar la glieud. Igl ei perencunter impurtont da differenziar dapli e risguardar il context. Tgi che va bugen cun auto vul forsa tuttina s’engaschar per la protecziun dil clima. E tgi che mira bugen Winnetou vul probabel buca far dil mal ad ina gruppa etnica.

Nus stuein vegnir en discuors e considerar autras vestas. Quei accentuescha il president dalla regenza grischuna Marcus Caduff en siu mandat per la Rogaziun Federala. Il respect enviers auters meinis ed il dialog duein impedir moviments extremistics e polarisaziun.

Nus essan in tgierp e vein il medem spért e la medema speronza. Tals maletgs drova la bibla per mussar che nus essan tuts colligiai. Il mandat dalla regenza puntuescha en quei senn la necessitad da ver respect dad autras persunas ed encurir il dialog. Pia, enstagl da cuorer suenter alla fuola da glieud, seschar en era sin auters meinis e tuns. Ei savess esser ch’ins scuviera gest lu zatgei remarcabel, sco la musica dad in che suna sin sia Stradivari.

RTR 08:45 Pled sin via

Artitgels legids il pli savens

Scrollar a sanestra Scrollar a dretga