Siglir tar il cuntegn

Header

audio
Nadal sin vias puleinas
Or da Vita e cretta dals 19.12.2023. Maletg: MAD
laschar ir. Durada: 3 minutas 14 Secundas.
cuntegn

Pled sin via «Nadal sin vias puleinas»

(sursilvan) Entuorn Nadal dat ei ina massa tradiziuns, rituals ed usits. Avon dus treis onns hai jeu menziunau en miu plaid sin via la tradiziun dad ir ina via cullas figuras da Nadal. Duront igl advent van ins pia da staziun tier staziun atras la casa, mintga gi in tec pli lunsch ed in tec pli datier dil liug, nua ch’il pigniel vegn plazzaus. Lezza ga hai jeu schizun fatg la proposta da cuntinuar quella via suenter ver dustau il pigniel e da purtar aschia Nadal en nies mintgagi.

Igl usit proscha sco igl entir Advent in agid per sepreparar sin la vegnida e naschientscha da Jesus.
Autur: Andri Casanova Teolog

Ussa, uonn, sun jeu staus avon ina nova sfida. Nus vein fatg quella via cun nies affon dad in onn e miez. Atgnamein hai jeu tuttavia buca giu dubis che quei funcziuneschi. Per ch’el survegni buca confusiun, vein nus buca marcau tuttas 24 staziuns dil viadi dalla bial’entschatta. Nus vein priu duas teilas e sin ina vein nus mess igl 1. da december Giusep, Maria ed igl asen, ferton che l’autra teila ei stada vita. Lezza era semtgada per la proxima staziun.

Nies affon ha pia fatg enconuschientscha l’entschatta december da nossas figuras da Nadal ed ha mintga damaun saviu metter ellas dad ina teila tier l’autra. In gi veva Maria la cuida da vegnir spustada sco emprema e l’auter gi fuva quei igl asen ni Giusep.

Aschia ei quei iu tiptop vinavon, tochen il gi ch’el ha viu da miezgi la teila vita dil gi avon ed ha immediat priu Giusep e Maria ensemen cugl asen ed ha mess els quasi in gi anavos. Jeu hai empruau da declarar – adumbatten! Per bien cletg ha el lu la sera puspei viu l’autra teila vita ed ha aschia mess las figuras el liug che nus vevan previu.

In pèr gis pli tard hai jeu lu stuiu rir sur da quell’entira situaziun. La finala eis ei gie buca la finamira da quella tradiziun da ver luvrau giu ils 24 posts exact tenor schema per lu saver far in crutsch. Anzi, igl usit proscha sco igl entir Advent in agid per sepreparar sin la vegnida e naschientscha da Jesus. E gest lez ei quel che ha mussau a nus che buca tut va tenor schema e tenor doctrinas.

Ei po pia esser ch’il bambin nescha uonn tier nus buca sut il pigniel, mobein enzanua auter, enzanua dapersei. Mo quei ei era bien ed endretg aschia. Quei ei Nadal!

RTR Pled sin via 10:00

Artitgels legids il pli savens