Siglir tar il cuntegn

Header

audio
Nos muond e la cruschada da Cairo
Or da Vita e cretta dals 28.11.2021.
laschar ir. Durada: 3 minutas 33 Secundas.
cuntegn

Pled sin via Nos muond e la cruschada da Cairo

Minchatant n’haja l’impreschiun cha nos muond sumaglia ad üna cruschada caotica sco ch’eu tillas cugnuosch da Cairo, la chapitala da l’Egipta. Da tuottas varts stumpla il trafic e’s maisda in üna gronda fuolla. I vain tütà e schmachà. Minchün cumbatta per seis dret, perche cha las reglas, quellas sun missas in dumonda daspö lönch. Quia ün asen chi tira ün char sper ün camiun surchargià, là ün taxi be bügnas chi sgratta bod vi d’ün auto luxurius bel glüschaint. Minchün tschercha da chattar la megldra via per rivar our da quist battibuogl. Tuot para caotic ed i grataja be cun fadia da mantegner üna tscherta survista da las differentas posiziuns ed ideas. Discretamaing as muossa però ün negoziar permanent tanter las differentas posiziuns, da dar davo i’l dret mumaint per rivar al böt mirà.

Nos muond dad hozindi sumaglia in blers reguards ad üna cruschada be canera sco p.ex. a Cairo; chi saja nossas discussiuns a reguard dumondas da pandemia cha nus vuschain quista dumengia, la debatta a reguard il clima o otras luottas actualas chi dividan per part famiglias e società. In ün punct essenzial para dad esser ouravant la cruschada da Cairo a nossa società actuala: i’l negoziar permanent tanter las differentas posiziuns ed il dar davo i’l dret mumaint. Vieplü pretendan singulas persunas da posseder la vardà absoluta e güdicheschan a lur prossems a man da lur persvasiun da maniera absoluta.

Ans regalain ün pa temp per verer nan e per tuornar pro nus svess, per substituir tuot l’agitaziun cun contemplaziun.
Autur: Stephan Bösiger Raverenda

In quista situaziun am vegn adimmaint ün pled da Gesu pro Matteus 7,1ff: «Nu güdicharai, per cha vus nu vegnat güdichats!… Perche vezzast tü la spina i’l ögl da teis prossem, ma nun observast la trama in teis ögl?… Tira il prüm la trama our da teis ögl, lura poust verer co cha tü tirast la spina oura dal ögl da teis prossem.»

Bain cler, cun quista tenuta nu schogliarana tuot il battibuogl sün quist muond, ma forsa güdess’la a debloccar divers conflicts – cun damain agitaziun e pregüdizi e daplü contemplaziun.

Per furtüna cumainza quista dumengia il temp d’Advent; el ans invida cun sias chandailas e savurs a tala contemplaziun. Ans regalain ün pa temp per verer nan e per tuornar pro nus svess, per substituir tuot l’agitaziun cun contemplaziun – nus tuots tilla dovrain.

Bella dumengia ed ün solen temp d’Advent.

RTR 08:45 Pled sin via

Artitgels legids il pli savens

Scrollar a sanestra Scrollar a dretga