En mes emprems meins sco plevon si Breil hai jeu fatg inaga in priedi sur il passadi dalla transfiguraziun. En quei capetel vegn ei raquintau, co Jesus ha priu Pieder, Giachen e Gion dalla vart e ch’el ha menau els sil cuolm Tabor. Leu sil cuolm ei Jesus vegnius transfiguraus, sia vestgadira ei daventada tarlischonta, il tschiel ei sesaviarts ed ina vusch detg: «Quei ei miu Fegl carezau, quel tedlei!»
Ei sa era esser in liug cun ina biala vesta, in plaz sut ina plonta ni era in baun sper in lag u ina caplutta.
Jeu sai aunc seregurdar che jeu hai detg en quei priedi che cuolms sappien propi esser loghens nua ch’ins sesenta pli damaneivel dil tschiel e forsa era empau pli damaneivel da Diu. – Suenter quella messa ha lu ina dunna dumandau mei, sche jeu sappi che Breil vegni era numnaus il «tabor dalla Surselva».
Na, quella expressiun vevel jeu udiu da lezzas uras per l’emprema ga. Mo el decuors dils proxims onns hai jeu adina puspei udiu tscheu e leu dil «Tabor sursilvan». Surtut sur Tarcisi Venzin permiert scheva mintgaton alla fin da nossas sentupadas a Dardin: «Stai cun Diu e bien retuorn sin il Tabor!»
Sche Breil, il Tabor dalla Surselva, ei propi pli damaneivel dil tschiel ni sche quels da Breil han ina buna cunscienzia da sesez, quella damonda sai jeu buca rispunder. – Mo jeu sai ch’igl fuss atgnamein bien d’haver aschi in «Tabor» en nossa veta. Ei sto buca exnum esser in cuolm. Ei sa era esser in liug cun ina biala vesta, in plaz sut ina plonta ni era in baun sper in lag u ina caplutta; semplamein in liug nua che nus savein schar nies mintgadi dalla vart per in mument, sesentir libers, esser damaneivels dil tschiel, far enzatgei bien per noss’olma e tancar nova energia per il mintgadi … – E nua has ti quei liug? Nua ei tiu «Tabor»?