(sursilvan) Mo tgi exact ei unics? Tgeinins ein tuttina? Tgi ei auters?
Gest ellas vacanzas a Gran Canaria sun jeu sedumandaus quei.
Ina insla spagnola ch’ei plein turists. El nord, sid, ost ni vest, emporta buc – las vias ein fullanadas.
Lungatgs audan ins ina massa – franzos, hollandes, chines, arab e tudestg. Tschiens lungatgs e dialects da tschiens differentas tiaras e tuts continents. Stgirs ed alvs, gross e satels, umens, dunnas ed LGBTQ, gronds e pigns, turists da consum, turists dalla natira, turists da sport, turists dalla splagia, turists dalla cultura ed indigens, famiglias cun affons, pèrs, sutgas da rodas, sauns e malsauns, burcas, nudists digl fkk, religius ed ateists, vendiders e cumpraders da cletg, ganovs, milliunaris e paupers dalla via.
Ed aschia vinavon. Lev surfatg – vaiel bunamein entupau l’entira paletta che viva cheu sin nies planet.
Franc e segir ha mintgin e mintgina in auter vargau ed aschia automatic in auter patertgar, in auter caracter, in’autra savida ed in’autra vesta da veta.
Vegnessen tut quellas persunas perina, sche tuttas sesessen vid ina meisa? Dess ei grondas differenzas? Dess ei carplina – ni dess ei harmonia?
Vegness la dunna ella burca ad anflar in fil da discuors cul commember dils hells angels? Vegness il milliunari a parter siu paun vid la meisa cul pauper schani dalla via? Savess il pader tener ils egls tier el duront discuorer vid la meisa cun la giuvna blutta digl fkk?
Damondas che jeu sun sedumandaus pliras gadas duront quels dis. Contas da quellas persunas han il sentiment ch’ellas mondien la suletta via correcta? Tgi ha il sentiment d’esser unics? Tgi ha il sentiment d’esser megliers ch’ils auters?
Tenor mei ha mintgin e mintgina il sentiment, che sia veta e siu far e cunfar seigi il dretg e gest. L’atgna via ei quella che fa senn ed aschia la correcta.
En mes egls ei mintgin ch’jeu hai entupau, viu e discurriu sin quell’insla unics. Unics en sia atgna moda e maniera. Viadis e vacanzas muossan a mi adina puspei, con vasts che nus carstgauns essan. E quei ei era ok aschia. Probabel fuss ei lungurus sche tuts fussen exact tuttina. Mett’avon… lu fuss jeu aunc uss en colonna avon il restaurant, perquei che tuts vulessen magliar tailandes. Na, engraziel. Gliez fuss veramein buca cool!
Inagada daniev, sundel cuntents da reflectar las persunas ch’jeu hai entupau sin quest mund. Quei fa bein. Quei arva il horizont ed engrondescha la toleranza enviers auters.
Ei viva l’individualitad – e che mintgin ei unics.
Ivo Orlik fa actualmain il studi da scolast primar a Cuira. Sper il studi è Ivo activ en la musica rumantscha sco «Giganto» e procura cun ses texts per discussiuns.
En collavuraziun cun RTR publitgescha la FMR adina en la davosa ediziun da l’emna il «Pled sin via». Quel è alura era d’udir mintgamai la dumengia tar RTR, en l’emissiun «Vita e cretta».