(sursilvan) Jesus ei morts avon bunamein 2000 onns. E tuttina enconuscha ozildi la gronda part dalla carstgaunadad siu num. Var duas milliardas e miez carstgauns senumnan cristians e cristianas. Pli ch’in quart dalla populaziun mundiala crei pia en Cristus. Mo daco? Lein dar in’egliada.
Duront il regiment digl imperatur roman Tiberius perdeghescha denter ils Gedius era in um da circa 30 onns: Jesus. El tschontscha avon 5000 persunas, gida ils paupers e medeghescha malsauns. Dunnas, umens ed affons tracta el cul medem respect. Persunas che confessan lur puccaus cusseglia el co semegliurar e perduna ad els lur puccaus. Perquei che mo Diu sappi perdunar ils puccaus, vegn Jesus accusaus avon dertgira gediua pervia da blasfemia e sentenziaus alla mort. Mo gliezza sentenzia schai els mauns dils Romans.
Jesus ha mussau ad els la porta per entrar enta parvis.
Ils Romans renconuschan buca la blasfemia, mobein igl aulttradiment. Ina tala sentenzia peisa grevamein ed ei in’intimidaziun. Jesus vegn torturaus e porta la crusch. Suenter uras vid la crusch miera Jesus, condemnaus alla mort dils Gedius e Romans. Ils giuvnals perdan lur speronza e lur fidonza. Sche lur Messias vegn tradius alla mort e sto murir, lu stat ei era per els schliet. D’in Diu tutpussent han els spetgau enzatgei auter.
Maria, la mumma da Jesus, e Maria da Magdalena vesan Jesus vid la crusch ed audan ses davos plaids. Ellas gidan il Gediu Giusep dad Arimathea da purtar il miert en fossa e lavan la bara. Ei siaran la fossa cun in crap semegliont ad ina mola. In di pli tard vulan ei embalsamar il tgierp – mo ei peglian tema. La fossa ei aviarta, la bara da Jesus svanida – tenor la lescha in crim mortal. Ei dueigien nuota temer, Jesus seigi levaus dalla mort, audan els.
Maria da Magdalena ei l’emprema che vesa el, quel ch’ei naschius da mort en veta. Ella selegra e raquenta las novitads nunspitgadas. Pli tard cumpara el era a plirs giuvnals che reagheschan cun sceptica e crein pér suenter in discuors persunal ch’el seigi veramein levaus dalla mort.
Cunquei semida il maletg. La pusseivladad dalla victoria da Diu daventa da maneivla per tuts, la malsegirtad dils giuvnals svanescha. Jesus ha mussau ad els la porta per entrar enta parvis. Crein quei aunc ozildi var duas milliardas e miez carstgauns?