Siglir tar il cuntegn

Header

audio
Pled sin via
Or da Vita e cretta dals 16.10.2022.
laschar ir. Durada: 3 minutas 14 Secundas.
cuntegn

Pled sin via Patratgs d’atun

Mirond da finiastra o fetsch jeu persenn: Ei fa atun. Brentina enzuglia nies quartier da Casut. Tscheu e leu vesel il tschiel blau che cuchegia tras la nebla. Ed en cuort vegn tut ad esser sclariu ed il sulegl scaulda e la pezza ei fetg datier. In magnific maletg.

Jeu gaudel la quietezia digl atun. Schegie, adina ei quei buca stau aschia. Pli baul era la stad mia stagiun preferida. E sch’enzatgi vess detg a mi enzatgei auter, vess mo scurlau il tgau. Ins di magari cun la vegliadetgna vegn ins pli sabis. Gest quels plaids paran dad esser vers.

Ussa vesel la veta ord in’autra perspectiva. Con bi eis ei che nus astgein viver cun las quater stagiuns. 

Gl’atun envida nus da spassegiar viado ella natira. Ed jeu gaudel da turnar, e sch’ei fa freid ed ei bletsch – metter enzacons lenns en pegna e star a cauld.
Autur: Andrea Cathomas-Friberg Catecheta

La primavera cu tut seregheglia – tut catscha da niev ed ei fa plascher da luvrar en iert e guder il cantinem dils utschals.

Lu suonda la stad. Guder la veta el liber. Las cauldas seras da stad envidan da star da cumpignia. Viver viaden el di e seruassar ni viagiar el lontan.

Ed ussa ch’ils dis vegnan pli cuorts e la brentina enzuglia la tiara, uss savein nus guder il ruaus e selegrar dallas bialas colurs. Gl’atun envida nus da spassegiar viado ella natira. Ed jeu gaudel da turnar, e sch’ei fa freid ed ei bletsch – metter enzacons lenns en pegna e star a cauld.

Suenter in temps forsa era empau melanconic suonda gl’unviern. El cuarcla la cuntrada cun ina cozza alva. Strusch in utschi aud’ins pli. Tscheu e leu in fastitg solitari. Tgi che sa e po s’entaupa sin pista ni sin loipa. Ils auters strusch ughegian da sortir ord casa.

E tuttina savein nus emprender bia dalla natira. Nus carstgauns essan adina alla tscherca ed emblidein savens ch’ei drova pauc per esser cuntents e ventireivels. Ei drova buca bia per anflar il dretg equiliber. Lein arver nos egls e far dapli stem tgei che schabegia entuorn nus. Viver cun la natira. Admirar la bellezia scaffiziun. Encurir sco la natira il ruaus per serevegnir e survegnir nova forza.

Tut ha siu temps – savein nus leger ella Bibla. El temps dad oz savess quei tunar aschia:

In temps per barhar ed in temps per ruassar.

In temps da raccoltar ed in temps da guder la raccolta.

In temps da sentupar e star da cumpignia ed in temps da seretrer  e ponderar.

In temps da realisar siemis ed in temps per planisar.

Lein pia guder gl’atun cun tut sias fassettas. Prender la caschun da recaltgar, sco las plontas en curtgin, nova forza. Beinsavend ch’ei vegn lu puspei in temps nua che tut seregheglia daniev ed ei dat nova veta.

RTR 08:45 Pled sin via

Artitgels legids il pli savens

Scrollar a sanestra Scrollar a dretga