Siglir tar il cuntegn

Header

audio
Pled sin via
Or da Vita e cretta dals 27.05.2022.
abspielen. Laufzeit 2 minutas 50 Sekunden.
cuntegn

Pled sin via Reclamas carmalan

Jeu seregordel aunc dil temps, cu nus vevan mo treis emetturs da televisiun. Denter las emissiuns era ei da mirar reclamas, perquei ch’ins saveva aunc buca sursiglir ellas sco ozilgi. Jeu sun carschida si cun la vacca violetta, igl uors dad aur che representa il «Gummibärli» e cun Meister Proper.

Dacuort vai jeu rimnau reclamas ord gasettas e revistas per ils giuvenils en mia classa da religiun. Ensemen vein nus analisau las strategias da vender in product.

Ina nova cuschina fa segir plascher, mo ella caschuna buca harmonia.
Autur: Anja Felix-Candrian Plevonessa

Per la cuschina moderna vegn fatg reclama cun ina dunna en vestgiu alv. Ella sepusa encunter ina scaffa e ri ella camera. Quella cuschina empermetta purezia ed eleganza.

In auter maletg muossa ina famiglia cun mumma e bab che han il fegl e la feglia sin schuiala. Reclama per ina assicuranza. Quella empermetta buca mo segirtad, mobein aunc ina veta da famiglia sco ord il cudisch da maletgs.

Plinavon fan in um ed ina dunna reclama per ina firma da finiastras. Lur fatschas tarlischontas corrispundan diltut allas finiastras. Buc in tac vid il veider.

Nus vein lu constatau ch’ei vegn fatg reclama cun svegliar siemis e cun empermetter buns sentiments. Igl auto stat per libertad e vitalitad, la bubronda meina nus en tiaras exoticas ed igl etg fa vegnir pli attractivs.

Nossa realitad semuossa in tec auter ch’en ina revista, quei ei clar. Tuttina seschein nus adina puspei carmalar da talas empermischuns. Perquei vegn vinavon investiu ton bia en reclamas.

Ils products san denton mo cuntentar, sche nus spitgein buca memia bia dad els. Ina nova cuschina fa segir plascher, mo ella caschuna buca harmonia. Ei dependa pia, tgei che nus fagein orda quei che nus vein acquistau. Ei dependa era da nossa tenuta. El 16avel psalm vegn urau ni cantau: «Ti muossas a mi la via dalla veta. Legria cumpleina ei avon tia fatscha, ventira perpetna da tia vart dretga.»

En muments da legria mirel jeu sin mias finiastras tschuffas e riel. Meister Proper sa era buca far miraclas – mo quei emporta schuber nuot.

RTR 08:45 Pled sin via

Artitgels legids il pli savens

Scrollar a sanestra Scrollar a dretga