(sursilvan) Igl onn 2025 ei staus signaus da bia eveniments specials per la baselgia catolica. Igl onn sogn ei vegnius annunziaus cul motto «Pelegrins dalla speronza», exnum da Pastgas ei papa Francestg morts, e gia in meins pli tard ei papa Leo XIV sepresentaus al mund culs plaids: «La pasch seigi cun Vus». Il document final dalla sinoda mundiala, che haveva priu si’entschatta igl onn 2021, ei vegnius publicaus il fenadur 2025.
Egl onn 1300 ein las portas sontgas sesaviartas per l’emprema ga per pelegrins da lunsch e da maneivel. Era 2025, pia 725 onns pli tard han ins saviu observar che cunzun glieud mudesta, per part fleivla e spossada ei passada tras quellas portas. Il «sempel pievel» ha demussau entras sia gronda preschientscha in veritabel exempel da cardientscha e speronza cristiana.
Las portas ch’ins ha aviert duein star aviartas. E sche quellas vegnan puspei serradas, eis ei forsa uras per nus tuts dad ir en cun in pei.
Sch’ins mira ussa anavos sin quei onn, survegn ins l’impressiun ch’ins hagi menau il process sinodal sin in binari da spetga per drizzar l’egliada sin ils differents eveniments a Roma.
Ed ussa? Co vinavon?
La bulla da 2025 cul tetel «Spes non confundit» che papa Francestg ha formulau per igl onn sogn, tschenta la speronza cristiana el center.
Sin la sava digl onn niev, alla fin digl onn sogn, vulein nus ussa sespruar da tener aviert quellas portas. La via sinodala sto vegnir persequitada vinavon.
La sinodalitad ei buca mo in project da structuras, mobein cunzun ina tenuta interna da mintgin singul. La speronza evitescha dad in maun da curdar en ina nostalgia e da l’auter maun da sespiarder en activissem. Senza speronza savein nus carstgauns buca viver. La baselgia era buc. Il diember da quels che s’allontaneschan dalla baselgia crescha ad in crescher.
Era sche la letargia para magari da strunglar la speronza, astgein nus buca capitular.
A caschun d’in survetsch divin a Trun ha uestg Bonnemain punctuau:
«La damonda ei buca: Tgei sa la baselgia far per nus, mobein: Tgei savein nus far per la baselgia?»
Lein perquei esser perdetgas verdeivlas da Jesus Cristus. Lein rimnar tuttas forzas per baghegiar vinavon vid la baselgia da damaun. Mintga cartent ei baselgia ed ha il dretg dad esser part dalla cuminonza. Negin astga vegnir sclaus. Las portas ch’ins ha aviert duein star aviartas. E sche quellas vegnan puspei serradas, eis ei forsa uras per nus tuts dad ir en cun in pei.
Il maletg dil pelegrin ei fetg significonts per la baselgia dil futur. Nossa baselgia sto semper star en moviment, emprender e sesviluppar culs segns dil temps. Il plaid «sinoda» schurmegia nus dall’ambiziun dad esser ina baselgia perfetga e finida.
Quei process sinodal astga buca mo schabegiar en cussegls, gremis ed autoritads da baselgia, mobein en collaboraziun cul sensus fidelium, cul pievel cartent.
Pertgei leu nua che la speronza sederasa, la cardientscha vegn vivida, ils mals parti, la cuminonza stimada e tgirada, leu agescha il sogn Spért cumpleinamein.