Avon treis jamnas, cuort avon las vacanzas da primavera, hai jeu zambergiau cun mia classa a Sursaissa in pign schenghetg per il di dallas mummas. Mia idea era ei da far ina biala carta cun si in maletg ed in cuort text d’engraziament. – Jeu hai muossau ad els in pèr ideas, co ch’ins savess illustrar la carta ed els ein semess immediat alla lavur.
Per mei er’ei lu fetg interessant da veser cun tgei inschign e tgei premura ch’els han fatg lur regals. Aschia ha ei lu era dau fetg bials maletgs: maletgs cun si fluras, auters cun cors colurai, entgins han scret si «TUT IL BIEN PER IL DI DALLAS MUMMAS» cun ina scartira decorativa.
Per mussar con bugen che jeu hai mia mumma!
La sera, suenter scola, hai jeu lu aunc inaga contemplau las lavurs dils scolars. Ed enzatgei ei curdau si a mi: tut ils scolars han malegiau gronds ni pigns cors sin lur maletgs! – Sco ei para s’auda il simbol dil cor tier il di dallas mummas.
Il simbol dil cor ei bein capeivels e drova negina explicaziun. El di: «Jeu carezel tei!» ni «Nus vein bugen in l’auter.» – Igl ei in simbol che vegn capius sigl entir mund. Da vegl enneu ed en biaras culturas, religiuns stat il cor per la carezia, mo era per nossa existenza humana cun tut sias habilitads, forzas e sentiments. Ed era la bibla di ch’il cor seigi il center dil carstgaun. Dil cor enneu dirigin e menein nus nossa veta. Sche nus vein in bien cor, in cor plein carezia, semuossa en nossa tenuta ed en nies cumportament.
Quei patratg ha regurdau mei ad ina lecziun da ductrina avon biars onns. Lezza gada han ils affons era astgau far in maletg per il di dalla mumma. Ina mattatscha ha lu malegiau in cor cun dus mauns. Cun smarvegl hai jeu dumandau ella, daco ch’ella hagi malegiau cheu dus mauns. Ed ella ha dau sco risposta: «Per muossar con bugen che jeu hai mia mumma!»
Quella mattatscha ha raschun! La carezia ei buca mo ina tenuta, mobein era in cumportament. Ins sto era muossar ch’ins ha bugen in l’auter. – Quei patratg ha lu intimau mei da far cun ils scolars aunc in ulteriur schenghetg per lur mummas. Aschia survegnan ellas bons, culs quals ellas san retrer pigns survetschs, (sco p.ex. gidar el tenercasa, bugnar las flurs ni far in’activitad communabla). – Sin quella moda din mes scolars «engraziel!» allas mummas per lur carezia e tut quei ch’ellas fan per els.
Ils cors malegiai survegnan aschia era mauns! – A vus tuts giavischel jeu in bi di dallas mummas.