Siglir tar il cuntegn

Header

audio
Sco ina fanestra-baselgia
Or da Vita e cretta dals 14.11.2021. Maletg: MAD
laschar ir. Durada: 3 minutas 21 Secundas.
cuntegn

Pled sin via Sco ina fanestra-baselgia

Ei era in di da november. Ina mumma mava cun siu fegl a far cumissiuns. Sin via tras il marcau han els dus traversau il plaz culla gronda ed imposanta catedrala. Il buob ha mirau sin quella baselgia ed ha detg: «Mumma, mira! Quellas grondas finiastras ein gie ualti stgiras. Quellas ein gie insumma buca bialas!» – La mumma ha lu era mirau sillas finiastras-baselgia. E senza dir in plaid ha ella priu siu fegl pil maun ed els ein entrai ella catedrala. Las finiastras che parevan giuado dad esser stgiras, han tarlischau e splendurau en las pli differentas colurs.

Plein smarvegl ha igl affon viu davontier ina finiastra cun duas figuras da sogns. «Mumma, tgi ein quels?», ha el dumandau plein marveglias. – «Quei ein sogns», ha la mumma detg, «quel seniester sil cavagl ei sogn Martin, in schuldau che ha partiu siu manti cun in rugadur che schelava. Quella dunna leu da vart dretga, cul canaster ed il ruog, quei ei sontga Lisabet. Ella era ina princessa ed ha gidau ils paupers e malsauns.» Il buob era satisfatgs da quella explicaziun.

In sogn ei in carstgaun e tras quel tarlischa il sulegl!

In pèr dis pli tard veva lu la classa dil buob instrucziun religiusa. Tutteninaga damonda la scolasta: «Tgi da vus sa dir a mi, tgei ch’in sogn ei?» – Il buob ha teniu si e detg: «Jeu sai ei! In sogn ei in carstgaun e tras quel tarlischa il sulegl!»

Era sche jeu hai udiu quella historia gia avon onns, quetel jeu quella risposta aunc adina geniala. – Esser sogns munta nuot auter che esser transparents per la glisch da Diu sco ina finiastra-baselgia.

Aschi different sco il sulegl lai splendurar las colurs dallas finiastras-baselgia, aschi different han ils sogns schau splendurar la glisch da Diu el mund. Sco sogn Martin e sontga Lisabet dat ei aunc oz biars carstgauns che sesprovan da far dil bien. Cun in bien plaid ni era bunas ovras emprovan els da purtar empau glisch ella veta dils carstgauns. Cun lur tenuta e cumpurtament lessan els esser per aschidadir «transparents» per il messadi digl evangeli ch’ei in messadi dalla carezia e buntadeivladad da Diu.

Quella risposta originala da quei affon ha lu era animau mei da tschentar las suandontas damondas: Co savein nus esser ozildi transparents per la glisch da Diu e co savein schar sclarir ella? A tgi savessan nus purtar empau glisch? Forsa ual ussa, el meins da november, nua che biars sesentan persuls, trests e melanconics...

Jeu sperel e giavischel che la risposta da quei buob ed era quellas damondas animeschan buca mo mei, mobein era entgin da vus, da sespruar el mintgadi dad esser transparents per la glisch da Diu sco ina finiastra-baselgia.

RTR 08:45 Pled sin via

Artitgels legids il pli savens