Siglir tar il cuntegn

Header

audio
Pled sin via: Arno Arquint - Sco üna partida da schah
Or da Vita e cretta dals 12.12.2021. Maletg: MAD
laschar ir. Durada: 4 minutas 30 Secundas.
cuntegn

Pled sin via Sco üna partida da schah

Pel mumaint ha lö a Dubai il champiunadi mundial da schah. Il Russ Ian Nepomniatchtchi prouva da detronisar il Norvegiais Magnus Carlsen, chi’d es champiun mundial daspö il 2013. Las partidas fingià giovadas d’eiran fich interessantas e sün ün nivel fich ot. Id es fascinant da perseguitar il cumbat tanter ils duos protagonists tant talentats. Suvent düran las partidas bleras uras, sco per exaimpel la sesavla, cha Magnus Carlsen ha pudü gudagnar finalmaing davo bod ot uras e 136 trattas.

Ün grond maister da schah es üna jada gnü dumandà: «Chenüna es la megldra tratta?» Quista dumonda nu fa natüralmaing ingün sen. I nun exista üna megldra tratta in general.
Autur: Arno Arquint Teolog

Cun guardar las partidas n’haja l’impreschiun cha quist gö (o esa forsa ün sport?) saja ün pa sco la vita svess. Adüna darcheu daja üna nouva situaziun, ingün mumaint nun es sco l’oter. Mincha situaziun pretenda dals giovaders üna resposta persunala. Tuot es in movimaint ed ils giovaders as ston adüna darcheu decider da nouv che plans ch’els vöglian perseguitar e che tratta chi dess esser la prosma. Nun esa precis uschè in nossa vita? Nun es mincha mumaint, mincha nouva situaziun sco üna dumonda cha l’uman ha da dar üna resposta tuot persunala? Scha quai ans plascha o na, la vita e na l’uman fa las dumondas, e l’uman ha da dar la resposta.

Ün grond maister da schah es üna jada gnü dumandà: «Chenüna es la megldra tratta?» Quista dumonda nu fa natüralmaing ingün sen. I nun exista üna megldra tratta in general. I dà adüna darcheu nouvas posiziuns ed in quellas daja bainschi mincha jada la megldra tratta. Ma quella ha adüna da chefar culla situaziun concreta e specifica süll’assa. E sco süll’assa da schah es quai eir in nos minchadi: la vita ans fa adün’inavant nouvas dumondas. Mincha mumaint es üna dumonda persunala a mai svess, üna dumonda drizzada be a mai e be in quist mumaint. Ed ingün oter, be eu poss respuonder a quista dumonda persunala. Tras quai dvainta mincha situaziun da nossa vita eir üna situaziun ch’eu am stoss decider, far nüglia nu funcziuna – o dit oter, eir quai es üna decisiun.

Sco pro’l schah ha l’uman l’incumbenza da far sias trattas, da trar sias decisiuns tenor meglder savair e da surtour lura la respunsabiltà per quista decisiun. Perquai cha mincha decisiun müda darcheu la situaziun, saja quai süll’assa da schah o illa vita. E cler, minchatant nun esa uschè simpel da dar üna resposta, minchatant es la decisiun fich difficila e douvra bler temp e ponderaziuns profuondas – ma finalmaing vaina da trar, vaina da far alch, vaina da’ns decider, eir scha nus nu savain, scha nus vain tschernü la megldra varianta. Sco pro’l schah nun esa pussibel da far oura il quint per tuot las variantas pussiblas e nus vain dad avair fiduzcha in nossa intuiziun. Quai es quella instanza in nus chi sa blerun daplü co tuot nos savair, ün’instanza chi’d es plü scorta co nos tscharvè. Suvent es ella be üna vuschina fina cha nus dudin be scha nus ans piglian il temp da tscherchar il silenzi chi’d es qua per nus adüna e dapertuot.

Eu ans giavüsch cha nus sajan adüna darcheu pronts da tscherchar las respostas a las dumondas cha la vita ans fa mincha mumaint adüna darcheu da nouv, cha nus ans piglian il temp da tillas stübgiar e ponderar a fuond, cha nus hajan eir la fiduzcha cha nossa intuiziun sapcha suvent daplü co nos tscharvè e cha nus hajan quatras il curaschi da respuonder in ün möd singular e persunal – e cha nus sajan lura eir pronts da surtour la respunsabiltà per nossas respostas.

RTR 08:45 Pled sin via

Artitgels legids il pli savens