(sursilvan) Ei dat differents texts pertuccont religiun e spiritualitad – texts dil fatg, oraziuns e texts che s’orienteschan directamein vid la veta. Il «Pleid sin via» dad oz corrispunda alla davosa sort – e focussescha silla miracla dad ina nova veta.
Tgei miracla! Nus essan en speronza: Schi pintga, schi nundetg pintga eis Ti l’emprema gada cura che nus vesein Tei. Ina sdrema curvada sil maletg dalla sonografia dalla miedia da dunnas. Quella sdrema curvada eis Ti, gia in pign carstgaun. Dus meins pli tard has Ti gia tut la detta e Tiu pign cor ha entschiet a batter. Igl ei fascinont da tedlar con spert che Tiu cor batta.
Tgei miracla! Uss eis Ti gia schi gronda, che Ti semuentas regularmein el venter. Ti dormas aunc adina la gronda part, mo Ti das gia da sentir a nus: Jeu sun cheu.
Cun mintga battacor creschas Ti e daventas pli ferma. Plaunsiu vala ei da far patratgs pertuccont il futur. Tgei semida tier Tei – en nossa veta, tgei vulein nus salvar, tgei stuein nus midar, tgei vala ei la peina dad adattar? Tgei fretgs vegn quella pintga miracla el venter a purtar in di? Pil mument stattan tuttas portas aviartas. Tgei vias vul Ti in di ir, tgei portas vegns Ti ad ignorar? Nus sperein che nus saveien accumpignar Tei aschia sco Ti has da basegns. Dar alas a Ti cu Ti vul sgular – e dar ina basa a Ti sin la quala Ti sas star e sesviluppar.
Tuttenina das Ti in stausch. Cheu, el venter, miez la notg. Jeu svegliel il bab. Lez metta il maun sil venter e smarveglia. Nus essan tut commuentai, fascinai. Tgei miracla! Uss eis Ti gia schi gronda, che Ti semuentas regularmein el venter. Ti dormas aunc adina la gronda part, mo Ti das gia da sentir a nus: Jeu sun cheu. Las examinaziuns dalla miedia muossan adina puspei: Tut ei en uorden. Tgei levgiament. Nus savein en tuts graus esser da buna speronza. Tgei miracla!
Nus spetgein sin Tei. Ina pintga, e tuttina ina gronda e grondiusa miracla. Tgei plascher, tgei deletg che Ti eis cun nus. Che Tia veta cuozi cuort ni ditg, nus engraziein per mintga mument che Ti eis cun nus.
