Siglir tar il cuntegn

Header

audio
Pled sin via
Or da Vita e cretta dals 04.09.2022.
laschar ir. Durada: 2 minutas 40 Secundas.
cuntegn

Pled sin via Sonchità sül Piz Beverin

Avant ün pêr dis n’ha eu fat üna gita sül Piz Beverin. Cun quai cha’l di d’eira fich chod, sun eu parti pür vers saira cur cha’l sulai nu schmachaiva plü uschè ferm. Eu sun chaminà davent dal Pass da Glas e d’eira tuot sulet sülla senda. Eu d’eira talmaing approfundi in meis impissamaints e la bellezza da la natüra ch’eu n’ha bod trat ün sigl cur cha dandettamaing d’eiran davant mai ün hom ed ün mat chi am gnivan incunter e m’han salüdà.

Tanter els d’eira üna gronda armonia, üna intimità profuonda, üna pasch straordinaria.
Autur: Arno Arquint Teolog e psicolog

Nus ans avain fermats e vain dat üna baderlada. Els han quintà ün pa da quai chi han fat quist di ed impustüt il mat – el varà gnü forsa desch ons – ha discurrü da quai ch’el ha tuot vis. El ha quintà cun bler plaschair ed eir cun ün pa ­superbgia dals chamuotschs e capricorns ch’els vaivan vis. I s’ha badà ch’el d’eira fich cuntaint, seis ögls glüschivan cur ch’el quintaiva. Ed eir il bap faiva l’impreschiun dad esser fich furtünà. Eir el vaiva quist tschert glüschir aint ils ögls, eir sch’el nu faiva gronds pleds.

Per mai d’eira l’inscunter cun quist bap e seis figl chi am quintaivan da lur di cumünaivel ün mumaint fich spezial. L’atmosfera in­tuorn els d’eira üschè singulara ch’eu nu tilla poss bod gnanca ­descriver cun pleds. Tanter els d’eira üna gronda armonia, üna intimità profuonda, üna pasch straordinaria. Quista atmosfera speziala es eir ­restada cur ch’els sun lura partits ­inavant. Eu n’ha badà ch’eu d’eira güsta gnü perdütta dad ün mumaint extraordinari, ün mumaint magic.

Sainza exagerar o vulair tunar massa patetic d’eira quist ün mumaint sonch per mai, ün mumaint i’l qual il tschêl e la terra s’han tocs. Quist duos cun lur esser insembel, cun lur intimità tuot speciala, cun lur affecziun, cun lur silenzi e cun lur glüschir aint ils ögls – quist bap e seis figl m’han muossà che cha’l pled sonchità voul dir.

RTR 08:45 Pled sin via

Artitgels legids il pli savens

Scrollar a sanestra Scrollar a dretga