(vallader) Sonda a las 8.30 al Gimnasi liber da Berna. Per üna jada nu sun las stanzas implidas da vuschs da magisters e scolaras. Ingün nu s’interessa hoz pel test da frances o tegna ün referat sur dal vulcanisem in Italia dal Süd.
Per ün di s’han inscuntrats passa 60 giuvenils e daplü da 200 rapreschantantas e rapreschantants da la baselgia chantunala bernaisa per tadlar e discussiunar ideas e visiuns dals giuvenils in connex cun la baselgia.
«Co as faja hoz baselgia?» es statta la dumonda.
La plü gronda sfida pels blers es statta da tadlar invezza dad argumentar, da dumandar davo invezza da güstifichar, dad acceptar maniamaints invezza da tils relativar.
Il contrast nu vess pudü esser plü grond: Sinodals in ün’età avanzada – quai correspuonda al Grond cussagl evangelic in Grischun – inscuntran giuvenils da 16 fin 20 ons. Impiegats da la baselgia cun lur savair professiunal discutan cun giuvenils cun experienzas praticas e visiuns.
Ils giuvenils han quintà da lur experienzas multifarias illa baselgia: da las uras da confirmands e gruppas da giuvenils, da cults divins da la dumengia e da quels per giuvenils. Els han quintà avertamaing co ch’els resaintan e che ch’els vessan spettà.
La plü gronda sfida pels blers es statta da tadlar invezza dad argumentar, da dumandar davo invezza da güstifichar, dad acceptar maniamaints invezza da tils relativar.
Id es gnü discussiunà ün di inter ed id ha fat impreschiun cun quant ingaschamaint cha’ls giuvenils sun stats aint per lur giavüschs. Lur ponderaziuns e visiuns hana express cun presvasiun e per mai s’ha cristallisà oura ün messagi principal per nossas baselgias: «Nu s-chaffi sportas per nus, ma tillas creai cun nus. Ans laschai contribuir nossas ideas e dat a nus spazi per provar oura. Nun as tgnai vi da las fuormas antiquadas ma dumandai davo il cuntgnü cun nus insembel. E impustüt: discurri üna lingua cha nus inclegiain.»
Scha nus salvain in quista fin d’eivna la festa da la refuorma e scha nus ans dumandain co cha nus pudain sviluppar nossa baselgia per l’avegnir, lura resuna aint in mai quella dieta a Berna. Ed eu n’ha imprais chi’s tratta damain da la dumonda co cha nus pudain interessar als giuvenils per la baselgia, dimpersè co chi grataja da crear spazis pels giuvenils cun lur agens interess e lur ingaschamaint.
Quai pretenda dals creschüts da tadlar invezza da quintar e da s’interessar invezza da spiegar e da’ns fidar in lur cumpetenza da surtour respunsabiltà. Sch’eu scriv hoz quistas lingias, suna plain spranza cha nus vain eir in avegnir giuvenils ingaschats – scha nus tils laschain. Quai vala per la baselgia sco per nossa società sco tala.
