(vallader) «Mia chasa, meis auto, mia barcha» – daspö ün pêr dis am va quista frasa adüna darcheu tras il cheu. Forza ch’ün o tschella ha badà: I’s tratta d’ün citat dad üna reclama illa televisiun dal temp da mia infanzia. Ün restaurant: Ün hom cun baja preschainta fotografias da seis possess a seis collega. «Meis, meis, meis … na teis. Uossa post esser schiglius da meis success e da meis possess.» Uossa preschainta eir tschel sias fotografias: üna chasa amo plü nöbla, ün auto plü svelt, üna barcha plü gronda. «Hast cret cha tü sajast meglder, uossa sast.»
Quista scena am tira adimmaint uffants pitschen illa sablunera cun lur giovarets. Il prüm giovna bain insembel, ma nus savain co cha quist gö va a finir: Pel solit cun dispitta e larmas.
Il possess sco tal nun es però il problem. Id es l’arsaja da posseder e da posseder daplü co tschel o dafatta da posseder la roba da tschel. Quai metta in movimaint üna spirala da conflicts latents. Nus tuots vain nossas sabluneras e cugnuschain quista spirala d’arsaja. Quant greiv chi’d es da tilla rumper, eir quai savain nus. I pretenda la prontezza da renunzchar.
Il possess sco tal nun es però il problem. Id es l’arsaja da posseder e da posseder daplü co tschel o dafatta da posseder la roba da tschel.
La schurnalista ed autura da crimis bernaisa Christine Brand ha fat quist pass in ün möd vaira radical. Cun 44 ons ha ella dat sü sia abitaziun e sia plazza da lavur ed ha dat davent üna gronda part da seis possess per cumanzar üna nouva vita. Ella descriva co ch’ella ha chattà nouva libertà e calma, nouva toleranza invers sai svessa ed avertezza invers oters. Ella scriva in seis blog da sia stanza unica in üna WG invezza dad üna chasa, da l’experienza da far la patenta da töf invezza da posseder ün bel auto e da viadis in pajais lontans invezza da girar cull’aigna barcha. Ella para dad avair chattà sia pasch.
Na cha minchün vess da dar davent seis possess per as redüer sül minimum. E listess das-chaina ans dumandar che chi füss, scha nus renunzchessan ad üna part da nossas pretaisas e dessan da bun cour. Id es nempe propi üna vardà profuonda vi da la sentenza cha l’uman guadogna cun laschar ir.