(vallader) In ün eivna sun elecziuns da la regenza grischuna. Ün ritual chi’s repeta mincha quatter ons. Ün ritual chi cumainza pel solit cun üna busta. Na, eu nu less lamentar da las difficultats da tilla drivir sainza tilla rumper. La busta soncha vain accumpagnada da fögls volants e placats ed üna tscherta agitaziun chi crescha cur chi va vers la dumengia decissiva. Pro’ls üns in vista da las schanzas da gnir elets, pro tschels in tschercha da quista banadida busta. Davo as tratta da ponderar las posiziuns, da tscherner las drettas persunas e da portar la glista dals elets al cumün. E la preschantaziun dals resultats in dumengia saira, quella es per tschertüns ün mumaint uschè emoziunal sco ün final da Hockey.
Ed il di davo? Il muond va intuorn sco avant – ma cun üna nouva regenza – e quai es bun uschè. I’l chantun Berna, ingio ch’eu viv daspö ses ons, sun stattas las elecziuns illa regenza ed il cussegl grond avant duos mais. Eir là ün veritabel carussel da candidatas e candidats per il cussegl grond – 163 be in meis district. Illa documentaziun e sün fögls volants hana preschantà lur visiuns fingià eivnas avant la gronda dumengia. La quantità da material es statta enorma e listess füss stat puchà da metter tuot il palperom be sül palperi vegl. Perquai n’haja decis da stübgiar tuot la documainta e da svilupar pro mincha posiziun dals candidats eir mi’aigna opiniun.
Grazcha al rom plü pitschen – nu vain elet inchün be pervi da sia reclama. Blerun daplü quinta la persuna e sias prestaziuns in ravuogl da la società.
Eu’m n’ha fatschendà cull’agricultura, l’economia e la politica dad ospidals, cun menüs vegans illas cantinas, vias da velos, cun antennas 5G e roudas da vent, cun la mancanza d’abitaziuns, problems dals lös turistics ed il potenzial da la periferia. Ma a chi eleger? Chi sta aint per mias posiziuns? Eu sun restà inavo cun üna gronda cunfusiun.
In Grischun sun ils circuls bler plü pitschens, la glistas plü cuortas e las vistas plü cuntschaintas. Damain schelta as pudess dir. Quai tuorna, e per part fess forza bain dad avair ün candidat daplü. Da tschella vart – grazcha al rom plü pitschen – nu vain elet inchün be pervi da sia reclama. Blerun daplü quinta la persuna e sias prestaziuns in ravuogl da la società. «A Ricardo duna mia vusch perquai ch’el s’ingaschà fingià in noss cumün. Eu nu sun dal tuot daperüna cun el, ma eu n’ha la fiduzcha ch’el es capabel da star aint per noss interess. Ed in quatter ons vezzaina lura.»
Forza cha grazcha a quist rom plü pitschen sta la persuna daplü i’l centrum co ün program politic; e forza chi grataian uschè eir in avegnir plüchönscht compromis contructivs a favur da l’intera società. Chi chi ha in mans pels prossems quatter ons savaina in ün’eivna e fin là quinta mincha vusch.