Tuot in ün dandet eir’la cò, la guerra. La granda part da nus nu pudaiva crajer cha in Europa saja darcho pussibla üna guerra. Üna guerra sainza suosta, düraunt eivnas: bombardamaints, citeds desdrüttas, milliuns da fügitivs. Tuot quelo as vegn a savair di per di sün tuot ils chanels da radio, televisiun ed oters mezs. Que nun es be üna guerra da destrucziun e crudelteds sül lö, ma üna guerra mediatica ed economica cun sancziuns e cuntersancziuns cun consequenzas eir tar nus.
Temps da guerra dumandan magari üna revisiun da noss impissamaints sur da guerra e pêsch. Che poss eau fer per la pêsch? Cò ed uossa.
Essans conturblos, scoss, sbalurdieus e plain cumpaschiun. Uossa as stu in qualche möd reagir sün quist battibuogl, eir quel in nossas testas.
Üna reacziun incredibla e stupenda es gnida scu ün’enorma uonda chi s’ho deraseda dapertuot: l’uonda da la solidarited in tuot las variantas. Bgerischma glieud es motiveda da der raps, roba ed ün dachesa, da güder in tuot las manieras e da manifester per la pêsch sün tuot il muond. Scolars e scolaras impizzan chandailas decoredas per la pêsch. Qualchün chatta cuffüert urand cun oters insembel per der curaschi a tuots quels chi sun immez la guerra, a quels chi haun da trer las grandas decisiuns ed a quels chi guardan tiers confus.
Temps da guerra dumandan magari üna revisiun da noss impissamaints sur da guerra e pêsch. Che poss eau fer per la pêsch? Cò ed uossa.
Que cunvegn da guarder in se stess. Cu vögl eau esser? Am vögli lascher strer vi e no da las emoziuns scu las föglias i’l vent? Nu füss que magari meglder per tuots dad esser calms e cun spiert attentiv?
Que voul eir dir da’s concentrer sül mumaint. Chatter in üna meditaziun u spassegiand illa natüra darcho l’equiliber per spiert ed orma. «Eau respir plaun aint e our e mieu cour dvainta ün zardin da la pêsch», ho scrit üna vouta ün muonch cuntschaint per sieu ingaschamaint. Agir our da se stess cul cour in maun e’l spiert alert es ün möd per esser vairamaing paschaivel. E che voul que propi dir?
Beos ils paschaivels: els portan amur – pardun – uniun – vardet – spraunza – algrezcha – la glüsch. Qualchosa da tuot que po fer minchün da nus eir i’l minchadi. Güst taunt per contribuir cun ün guot da spraunza a la granda uonda da pêsch.