Tgei carstgaun vi jeu esser? Persunas che setschentan quella damonda meinan savens in diari. Sin pagina 1 descrivan ellas lur persunalitad ch’ellas vulessan esser. Jeu envidel vus da vegnir cun mei sin ina biala terrassa, dar in’egliada en treis diaris e lu ponderar, tgei che vus scrivessas sin pagina 1 da vies diari.
Ei entscheiva a neiver. Nus fagein in te cauld e mein sin terrassa. Nus sezugliein en en cozzas che dattan bi cauld e prendein enta maun il diari d’ina miedia. Sin l’emprema pagina stat scret: «Jeu sun honzelia, muossel cumpassiun pil concarstgaun e sai luvrar fetg exact.» Nus vulvin in pèr paginas e sin pagina 23 legin nus: «Oz vai jeu la sera tard aunc giu ina pazienta ch’jeu vai stuiu operar. Per cletg vevel jeu la damaun fatg mia spassegiada tras igl uaul. Jeu erel aschia era la sera aunc fetg ruasseivla e l’operaziun ei gartegiada.»
Las steilas tarlischan. Igl emprem pass ei fatgs. Ils proxims onns suondan bia paginas. Ussa ein ellas aunc vitas.
Nus prendein enta maun il diari d’ina protectura d’igl ambient. Sin l’emprema pagina stat scret: «Jeu s’engaschel per la natira intacta ed il schurmetg dad animals.» Interessai arvein nus per schabetg pagina 45 e legin il suandont: «Oz era in di ner. Nus vein puspei anflau tgauns maltractai. Mo silmeins vein nus saviu liberar els. Ussa stuein nus anflar ina sligiaziun per els.» In onn pli tard stat scret: «Mintgaton dat ei miraclas sin quest mund! Ils possessurs dils tgauns maltractai han aviert ina scola per tgauns da salvament. Nossa collaboratura ei la nova menadra. Damaun entscheiva l’emprema scolaziun!»
Nus buin in sitg te e realisein, ch’ei ha calau da neiver. Ei vegn plaunsiu stgir. Nus ardein in pèr candeilas e prendein enta maun il tierz diari. Sin l’emprema pagina legin nus: «Jeu sun adina cheu per mia famiglia e s’engaschel per ils carstgauns che han buca giu ton cletg en lur veta sco jeu. Jeu segidel cun els dapertut nua ch’igl ei pusseivel.» – Nus mirein cuort enviers il tschiel stgir e sedumandein: «Tgi sa, con bia dil bien che la scribenta da quellas lingias ha saviu effectuar en sia veta?» – Nus mein en casa, prendein in carnet da notizias e turnein sin terrassa. Leu arvein nus pagina 1 e ponderein:
«Tgei carstgaun vi jeu esser? Co vesa miu plan per ina buna veta ora?» Gleiti ei l’emprema pagina emplenida cun nossa visiun. Nus mirein puspei enviers il tschiel. Las steilas tarlischan. Igl emprem pass ei fatgs. Ils proxims onns suondan bia paginas. Ussa ein ellas aunc vitas.