Siglir tar il cuntegn

Header

audio
Pled sin via dad Andri Casanova
Or da Vita e cretta dals 25.02.2024. Maletg: Andri Casanova
laschar ir. Durada: 3 minutas.
cuntegn

Pled sin via «Tgei ei respect?»

(sursilvan) La damonda, tgei che respect seigi, ha fatschentau mei baul en mia veta. Sche vus udis quei, tgei pudeis tertgar? Uei, quel cheu para dad esser staus baul madirs! Ni: Quel tscheu ei schon staus da pign in filosof e teolog! Jeu sai gir a vus: Ni in ni l’auter constat. Jeu sun semplamein staus in stroli fatgs si cun pugn.

Tgei ei pia capitau: Ei sto esser stau ella secunda ni tiarza classa primara che jeu hai puspei fatg furbarias en scola. Nies scolast Flavio po ver tertgau: Quel cheu duei mo mussar, sch’el ei propi aschi madirs sco el sedat magari. Ed aschia ha el dau in castitg a mi cun il pensum da scriver in cuort text davart la damonda «Tgei ei respect?».

Ed aschia ha el dau in castitg a mi cun il pensum da scriver in cuort text davart la damonda «Tgei ei respect?»
Autur: Andri Casanova

Quei ei secapescha stau rufinau dad el. Jeu pauper scolaret gnanc savevel, tgei che quei seigi propi. Pia ha ei buc dau auter che da dumandar discretamein a casa. Lezs han secapescha immediat ferdau l’aura.

Basta, jeu manegel che quella episoda ha nuota fatg donn a mi. Ed jeu sefatschentel aunc oz regularmein culla damonda, tgei che respect seigi. Forsa ei gest gliez ina buna tenuta, pia dad adina puspei ver present quella damonda ed empruar da rispunder ella.

Cu nus essan per semeglia vid translatar per la Bibla romontscha ecumena, vegnin nus meinsvart confruntai cun situaziuns da respect ni era da munconza da respect ella bibla. Il classicher, sch’ins less gir aschia, ei la schinumnada tema da Diu. Quei ei ina tenuta enviers Diu che cuntegn stema, carezia e respect.

Mo oz less jeu dar in’auter exempel da respect biblic. Igl ei ina tenuta fascinonta ed admirabla. Ils Israelits ch’ein stai sclavs ell’Egipta han nudau en lur e nossa bibla, el cudisch Leviticus: «Sch’in jester stat tier vus en vossa tiara, buca supprimi el. Igl jester che viva denter vus duei valer sco indigen. Ti dueis carezar el sco tetez, pertgei era vus fuvas jasters en la tiara d’Egipta.» (Lev 19,33–34)

Quei ei bein respect ed exempel!

Pled sin via ;

Artitgels legids il pli savens