(sursilvan) Hells Angels – per romontsch «Aunghels digl uffiern». Quei ei in club da töfs ch’ei dat dapi 75 onns. E quei en plirs tschiens marcaus en varga 50 tiaras. Ell’Asia, Africa, America en l’Europa – a Turitg ed era el Vorarlberg. Lur cumparsa e lur simbols, ina Harley e cutta da curom cun cavazza e flommas, ei legendara. Igl ei in club, nua ch’entusiasts da töfs s’entaupan, s’engaschan e vivan la cuminonza dad in’uniun. Els meinan bars, organiseschan fiastas e s’engaschan per part, tgunsch plitost darar, era per iniziativas caritativas. Principalmein per persunas che vivan ordvart la norma dalla societad ein ils Hells Angels ina instituziun che dat structura e sustegn el mintgadi. Tochen dacheu – tut bien ed endretg.
Ei dat denton aunc in’autra vart dils «Aunghels digl uffiern», ina vart medemamein bein enconuschenta e che vegn, curiosamein, savens era percepida sco – legendara. Certas persunas, per part entiras fracziuns dils Hells Angels, ein numnadamein criminalas. Activas ella scena da drogas, prostituziun e sclavaria. Pliras gadas eran exponents dils Hells Angels gia vegni confruntai, persequitai e sentenziai pervia dad abus sexual. Tut raschuns daco che quei club da töfs ei scumandaus en entginas tiaras. – Denton buc en Svizra.
Ins sto denton era conceder: Ils Hells Angels ein in’organisaziun mundiala cun plirs dieschmellis commembers e simpatisants. Giudicar quell’organisaziun sin fundament da singulas fracziuns ni persunalitads criminalas ei forsa buca diltut gest. Igl ei denton aunc in auter aspect che dat a quell’entira organisaziun aschi in curios tef. Cun quei manegel jeu las reglas e structuras dils «Aunghels digl uffiern». Igl ei numnadamein in club, nua che sulet umens astgan entrar. In club cun ina clara e strentga hierarchia che accepta negins commembers homosexuals. Persunas cun ina colur da pial stgira vegnan toleradas pér dapi in pèr onns. E quei aunc adina sulet en singuls loghens.
Uss, co vulein nus sco societad ir entuorn cun organisaziuns che dattan zuar a biaras persunas structura e sustegn. Ein denton aviartamein homophobas, sexisticas e responsablas per abus sexual?
Tolerar? – Ignorar? – Regular? – Scumandar?