(sursilvan) Jeu hai giu plascher dalla proposta d’Orlando da cuntinuar nies brat da meinis el proxim Plaid sin via. Ferton che jeu vevel reagau la primavera sin ses plaids pertuccont il crer, savessi el quella ga dar ina replica sin mes patratgs. P.ex. patratgs entuorn la damonda, tgei che vegni suenter la mort?
Atgnamein ina bun’idea, setracta ei cheu gie dad ina dallas grondas damondas humanas. Mo detg sincer sun jeu stada empau surprida dalla proposta da sefatschentar cun quella tematica a miez la stad, cu tut ei en cumpleina fluriziun, cu nos patratgs vid il tschiel ein plitost colligiai cun ils sgols da vacanzas che cun il patratg dalla veta celestiala. Gest en quei mument sun jeu vegnida confrontada cun la mort anetga d’in convischin. Raschun has, Orlando! La veta e la mort ein soras, schibein igl unviern sco era la stad.
La veta e la mort ein soras, schibein igl unviern sco era la stad.
Mo la sfida da rispunder la damonda ei beinprest semussada: Co duess jeu explicar mia cardientscha en ina veta suenter la mort, en ina nova veta tier e cun Diu, en siu reginavel? Co exprimer il sentiment ch’ils defuncts ein vinavon da maneivel a nus e che Dieus cumplenescha quei ch’ei stau fragmentaric en nossa veta sin tiara? Co far valer la savida teologica davart ils davos fatgs, co declarar ils raquents biblics che plaidan dalla levada – e quei en treis minutas? Nunpusseivel!
Inaga dapli vegn jeu alla conclusiun che schibein nies vocabulari sco era nies tschurvi surveschan bein alla realitad ed als basegns da quest mund. Per exprimer quei che vegn suenter la mort, ein schibein nos plaids sco era nies tschurvi surdumandai. Nus savein buca far auter che patertgar, plidar e s’exprimer en spazi e temps. L’auter mund, quel tier Diu, ei denton, infinits ed eterns, pia senza spazi e temps. Mo co lu s’immaginar l’infinitadad e l’eternitad?
Buca per nuot ha Jesus plidau schi savens en maletgs cu el ei sespruaus da declarar il Reginavel dil tschiel, pia quei che vegn suenter la mort, mo entscheiva gia cheu ed uss: cu nus vivin pasch, cu nus stein en per giustia e semnein carezia. Ses maletgs, sias semeglias lain sentir che siu reginavel enconuscha autras mesiras ed in’autra logica che las mesiras e la logica da quest mund.
Pia, tgei vegn suenter la mort? Jeu ni sai ni less rispunder quella damonda. Ella sa ed astga star in misteri. Mo jeu sentel e creiel: La mort ha buc il davos plaid.