(vallader) «The same procedure as last year?» dumonda il butler James. La madama respuonda «The same procedure as every year!» e l’istorgia absurda piglia sia via – plü co fazil tilla cugnuschaivat. «Dinner for One» vain nempé muossa illa televisiun pel solit a Silvester, e quai daspö passa 60 ans.
La festa da Nadal in famiglia ha minchatant ün aspet da quel sketsch inglais. Üna jada l’on; ma lura stess esser tuot precis sco adüna, apunto: «The same procedure as every year!» Il bös-chin in stüva porta sias chandailas cotschnas, la maisa da festa es missa cun la bun tuaglia. Nadal vain celebrà sco festa da famiglia cun sias tradiziuns. Pels üns ün spür dalet, per oters üna tortura e pel solit ün pa tuots duos.
Üna jada l’on; ma lura stess esser tuot precis sco adüna, apunto: «The same procedure as every year!»
Tuots s’inscuntran pro la chara nonna chi ha cuschinà – ed a maisa chattaina fradgliuns chi’ns stan a cour; ma i’ns spettan eir quels Paraints cha mai nu vain chattà la storta e cha nus eschan cuntaints da tils na verer massa suvent. Eh schi: parantella in tuottas variaziuns.
A maisa, dürant il past opulent vain discussiunà e fat oura parantella inavant ed inavo: Co d’eira quai quella jada. Davo bös-chin e bleras brancladas, cun vainter e cheu plain as tuorna darcheu pro sai e’s vain darcheu in sai.
Quai es mi’istoriga da Nadal: Ella am surdumonda pel solit ed eu vegn tuot stuorn pervi dals ils fils indombrabels chi vegnan trats in crusch ed in travers. Da tschella vart vegna però eir cunsciaint ch’eu fetsch part dad üna rait vasta chi surpassa dalönch la maisa da festa. Ch’eu sun svess ün nuf da la rait là ingio cha duos fils as han cruschats üna jada. Minch’on constatescha cha mia rait ha da tuotta sorts nufs, ma ch’ella porta malgrà – na: grazcha a quels.
Ed in d’üna jada am chatta immez l’istorgia da Nadal chi’m es dvantada la plü preziusa: L’istorgia da Nadal sco cha Matteus tilla cumainza: cun üna lunga tabla da parantella. 42 generaziun invao va seis sguard per cumanzar, scha na pro Adam ed Eva, schi almain pro Abraham e Sara. El derasa la rait da la parantella per trar adimaint, cha Gesu nun es be crodà giò dal tschêl, ma ch’el fa part da la famiglia e cha nus fain part da sia famiglia, malgrà – na: grazcha a tuot ils nufs.
Per mai es Nadal la festa dals nufs – Parts faina oura ed i’s revelscha üna preziusità, oters ans dvaintan prezius perquai chi restan dürs. In mincha cas fan els part la rait chi porta la famiglia. A Nadal piglia Dieu sün ün dals fils per cha seis figl dvainta ün nuf vi da nossa rait. Quai es tantüna üna buna nouva.