Tras il ligiom dalla pasch… sut quei motto han biars cristians sigl entir mund urau il venderdis sera. Quei emprem venderdis dil meins ei numnadamein dedicaus al di d’oraziun mundiala.
Gia ditg avon che l’uiara en Israel e Palestina ei escalada, han dunnas ord differenzas confessiuns cristianas mess per scret lur patratgs, lur experienzas e lur giavischs. Oz less jeu schar vegnir a plaid quellas dunnas engaschadas per ina convivenza pascheivla, senza pregiudezis, senza giudicar e senza prender partida.
El center dalla liturgia stattan ils plaids da s. Paul a quels dad Efesus:
«En tutta humilitonza, migeivladad e pazienzia, suportei in l’auter cun carezia e sespruei da mantener l’unitad entras il ligiom dalla pasch.»
Sch’ins vul discuorer da pasch, lu va ei meglier da dar tips als auters.
Bials plaids – mo ein quels en vesta alla situaziun actuala buca mo in siemi?
Sche nus vegnin gnanc el pign, denter nus da suandar els – co duess quei gartegiar sigl entir mund?
Sch’ins vul discuorer da pasch, lu va ei meglier da dar tips als auters. Essan nus denton pertscharts che la pasch entscheiva el pign, tier mintgin da nus.
Co stat ei cun la pazienzia e migleivladad tier mei? Tgei mesira drovel jeu per giudicar ils auters? Sun jeu promta, promts pil ligiom dalla pasch?
Las dunnas ch’ein s’engaschadas per la liturgia sestentan era en lur tiara per pasch, capientscha, sestentan per buns loghens d’emprender, vegnir sauns ni plaz da lavur. Ellas han mauns e portas aviartas pils carstgauns da differentas confessiuns e religiuns, pertgei ils cristians ein ella minoritad. Muort l’uiara ei bia vegniu fatg empaglia. Tuttina sedattan ellas gronda breigia da purtar vinavon la speronza, pertgei bunamein la mesadad dalla populaziun palestinesa ein affons e giuvenils. Auda enzatgi, en tut la canera d’uiara, lur clom?
In clom, ina speronza, in fervent giavisch – per quel vala ei la peina da s’engaschar da tutta forza. Las armas dueien ed astgan buca haver il davos plaid. Aschia vi dar allas dunna palestinesas in davos plaid:
«Salam al Massih», la pasch cun vus. Lein dar curascha in a l’auter per: che nus seigien ferms per las damondas che stattan a nus a cor. Da s’engaschar per pasch e sustegn per tut quels che piteschan sut supressiun, violenza e discriminaziun.
Nus vulein supportar cun carezia ina l’autra tochen che la pasch e giustia secumpleini sigl entir mund.
Aschia tonschel jeu a vus tuts il ligiom da pasch cun la speronza ch’el porti fretg en nies mund plein malapasch e malgestadad.