(vallader) Tschiquaisma es LA festa da prümavaira. Tuot as sdruoglia. Illas chasas vegn scuoda oura la puovra da l’inviern. La natüra as sdaista, prüischa e splendura. Ils ultims pass drivan e las rotschas da töffs e velos surpiglian darcheu las vias. Tuots sun in movimaint e profitan dals dis libers per chattar recreaziun e per tancar nouva forza our’il liber ed illa natüra.
Eu n’ha bleras jadas l’impreschiun cha per blers detta ün temp avant e davo Tschinquaisma. E cha quista dumengia es sco üna cesura, da cura davent blers vivan in ün oter spiert. Zoppada suot la vetta da l’ignoranza passaintan in ün möd il sen inizial da Tschinquaisma. Da quella jada avant 2000 ons a Gerusalem, cur cha’l spiert da Dieu ha tut possess dals apostels e tils ha fat star sü per ir d’ün möd nouv tras il muond e vers la glieud.
Grazcha a tuots trais aspets – da la forza, da l’amur e da la prudenza – po’l dvantar ün spiert da la libertà. Eu crai cha quist spiert es precis quel, chi’ns fess bain in quist temp da müdamaints e d’intschertezza.
Id es il spiert dal qual sta scrit illa seguonda charta a Timotheus: “Il spiert da Dieu nun es ün spiert chi scuraschescha, dimpersé il spiert da la forza e da l’amur e da la prudenza.”
Il spiert da Dieu es oramai ün da la forza chi lascha vendscher las sfidas da la vita – ma ün spiert da forza ris-chess da’ns render umans brutals. Our da quel motiv e’l eir ün spiert da l’amur chi’ns permetta da’ns laschar aint cun nos prossems –ün spiert be d’amur ris-chessan però da’ns perder tanter las nüvlas rösas. Perquai as tratta eir d’ün spiert da la prudenza. El ans lascha far adüna darcheu ün pas inavo per reflettar nossa realtà – ma il spiert da la prudenza sulet cumpigliess il privel da’ns bloccar ill’esitaziun, perquai cloma’l davo la forza chi’ns metta darcheu in movimaint. Grazcha a tuots trais aspets – da la forza, da l’amur e da la prudenza – po’l dvantar ün spiert da la libertà.
Eu crai cha quist spiert es precis quel, chi’ns fess bain in quist temp da müdamaints e d’intschertezza. Ün spiert chi nu’ns lascha perder il curaschi, cur cha nus ans chattain cunfruntats cun las crudeltats da quist muond. Ün spiert chi’ns da ragischs tras sia forza, là ingio cha nus eschan miss in dumonda. Ün spiert chi lascha crescher las relaziuns tanter ils umans tras si’amur, ed ün spiert chi’ns preserva dals pregüdizis tras sia prudenza. Tuot in tuot quel spiert chi nu’ns maina be our’il liber ün bel di da prümavaira, ma chi lascha crescher la libertà in noss intern. Ün spiert chi renda noss muond plü uman.
Mincha Tschinquaisma es üna nouva schanza cha’l Spiert da Dieu piglia dmura in noss muond.