(sursilvan)Ils dis vargan ad incuntin, e tuttina stein nus aunc alla sava d’in niev onn. In onn niev e tut ei niev? Nov’entschatta? Ei quei propi aschia?
Jeu crei ch’ils pli paucs da nus hagien schau anavos tut il vargau. Pilpli vai vess da schar cumbien ed entscheiver ina nova caussa. Ei drova in plan, scuar avon l’atgna porta e far entgins patratgs.
Forsa veis schizun fatg enqual propiest. E forsa veis era gia bess quel da pegn’en.
Per mei ha quei niev onn ina muntada tut speciala. El ei el ver senn dil plaid ina nov’entschatta. Bia ei semidau il davos onn. Bia bials, mo era trests muments. Prender cumiau e regurdientschas. En quei temps hai sentiu consolaziun els plaids: Tut ha siu temps.
Jeu sun vegnida pertscharta ch’ei dat ella veta adina puspei temps da rir e da bargir. Temps d’esser ventireivels e temps da tristezia. Temps cun quitaus e buordis e temps da plascher. Temps da cumpignia enten esser leghers e temps pli ruasseivels e pensivs. Temps plein energia e temps da ruaus.
Segir savess jeu aunc ditg giugar cun plaids. Ed era mintgin da Vus fuss habels da cumpletar mes patratgs.
Il temps ch’jeu prefereschel ei quel da speronza. Il temps da veser il bien en mintga situaziun dalla veta. Mintga experienza negativa fa vegnir nus pli ferms. Il positiv pren surmaun e fa nus cuntents.
In da quels temps da speronza ein ils dis denter Nadal e Buania. Il temps che vegn da vegl enneu numnaus per tudestg «Raunächte».
In temps plein magia e misteris. Igl ei il temps dalla midada dil sulegl. Il temps dall’escha aviarta. In temps da seregurdar e fimentar ora.
Restau da quella veglia tradiziun pagauna ei il fimentar ora ed ils buns giavischs. Tredisch giavischs vegnan mess a scret. Mintgadi vegn barschau in giavisch, in bien patratg.
La habitaziun vegn fimentada ora cun bunas jarvas ord iert e pastira. Quellas jarvas portan buna e nov’energia en casa. Ellas duein scatschar quei che muenta nus, quei che retegn. Ellas gidan a far il pass sur la sava digl onn vegl ed ughegiar ina nov’entschatta plein speronza e fidonza egl onn niev. Lein pia esser pertscharts che avon dudisch dis ha mintgin da nus aviert l’emprema pagina d’in niev cudisch. In cudisch cun 365 paginas. Uss essan nus dumandai da sestentar e far il meglier ordlunder. Scriver daniev pagina per pagina ed ir plein speronza e curascha tras igl onn 2025.