Avon 16 onns sper la mar en Croazia, leu eis ella vegnida intunada, la canzun da Tgalaveina. Ils plaids «Udis il clom en la vallada…» eran d’udir per liung la mar. Nus vevan gest dumignau la matura, e fantasts sco nus eran, vein nus cantau quella ed autras canzuns romontschas cun grond’ardur sin nies viadi da matura.
Cantau vein nus egl eroplan, sper la mar ed ell’ustria. In viva sin la libertad grischuna, in viva sin signuns e purs, in viva sils catschadurs, gie in ferm viva sils muntagnards. La glieud veva tschaffen, la finala vevan nus era zacons buns cantadurs denter nus.
La canzun fa curascha, unescha e dat identitad. Mo quei setener ensemen sebasa alla fin dils quens sigl inimitg communabel.
Secapescha negin che saveva, tgei che nus contien. Applaudiu vegneva ei tuttina. Ualvess ch’enzatgi vess sminau che nus contien cheu ina canzun d’uiara: «dabot las armas enta maun…» e «tut a sfraccond en il cumbat». Ei ha plaschiu alla glieud.
Probabel vein era nus lezza ga buc fatg nauschs patratgs, tgei che nus contien. Jeu less tuttavia buc ch’ins stuess entscheiver a tabuisar tals texts. Pli impurtont eis ei da reflectar els, d’enconuscher il context e da patertgar.
E veramein dat enzatgei da patertgar a mi tier quella canzun. Ella ei gie ina canzun che fa curascha, unescha e dat identitad. Mo quei setener ensemen sebasa alla fin dils quens sigl inimitg communabel. Pia, igl inimitg communabel fa che nus segidein, secapin e s’engaschein. Quei dat da patertgar!
Ein ils gronds plaids da libertad vits ed alla fin less ins semplamein far ir ali giavel ils inimitgs? Ein era cloms da libertad che nus udin en nos gis, spirontamein muments per attaccar e sedefender? Sedefender per sedefender? Con reflectai ein quels cloms?
Clamar e grir encunter schinumnai inimitgs, gliez ei la via sempla. Mantener respect in visavi l’auter e tedlar sinceramein il proxim, gliez ei la via cristiana. Quei ei pretensius. Udin nus pia ils differents cloms en la vallada?