(vallader) Ün di chi nu cumainza cun üna bella coppa tè? – Per mai greiv da m’imaginar. La coppa tè am metta illa buna disposiziun per tour per mans il di: Il prüm esa da far buglir l’aua, masürar giò las föglias sechantadas in üna comma, lura es da svödar precautamaing l’aua sur las föglias, laschar trar cun pazienza sco in üna meditaziun, sezzer nan e til baiver süerv per süerv. Laschar cular giò da la gula quist extrat chi svaglia ils sens. Pür davo sun eu pront pel di.
Il sen da la vita es sco üna coppa tè.
I dischan cha tschertüns fetschan quai cun cafè, per mai esa il tè.
In connex cul tè n’haja inscuntrà ultimamaing üna episoda chi vain quintada dal psicoterapeut american David L. Shapiro. El es specialist illa psicologia forensica ed ün stübgià recugnuschü in seis chomp. I vain dit cha Shapiro saja stat in tschercha dal sen da la vita ed haja fat ün viadi tras l’India. El vaiva nempe dudi dad ün hom vegl ourdvart sabi e scort. Davo grondas fadias esa gratià a l’American da chattar a quist vegl in sia chasetta tuot al nord dal subcontinent.
Ch’el saja gnü aposta da New York per imprender dad el che chi saja il sen da la vita, ha’l spiegà al vegl. Quel ha dat üna risada ed ha dit cha la resposta saja tuot simpla: «Il sen da la vita es sco üna coppa tè.» Il vegl sabi ha vis cha’l scienzià american til guarda cun ün sguard stut e til ha dumandà: «O vaivat üna megldra proposta?»
E vus? – Bella dumengia.