Siglir tar il cuntegn

Header

audio
Pled sin via
Or da Vita e cretta dals 13.07.2022.
laschar ir. Durada: 2 minutas 57 Secundas.
cuntegn

Pled sin via Unics e tuttina uni

Finalmein eis ei aschi lunsch. Suenter dus onns pausa passentein nossas vacanzas en Croazia. Nies liug preferiu che ei plaunsiu sco in secund dacasa. Igl ei mintga ga in sentiment tut special, cu las portas dil campadi sesarvan. Avon nos egls leva il sulegl. En sia glisch semuossa la mar e differents tuns blaus. Il tun dallas undas da mar fa beinvegni ed ei freda da vacanzas.

Ei para, sco sche nus vivessan en in auter mund. Lunsch naven dalla realitad, senza carplinas, sescagnems e demonstraziuns da pussonza. Semplamein ina cuminonza da campaders che ha schau ses quitaus a casa.
Autur: Andrea Cathomas-Friberg

Enamiez quei maletg idillic secasein nus cun nossa rulotta. Tgei che fa adina puspei smarvegliar: Nus essan buca persuls. Pil mument vivan dapli che 6'000 persunas cheu cun nus. Glieud da pliras naziuns, gest sper nus hai Austriacs, Hollandes, Tudestgs, Talians e Slovens. Di per di udin nus in schischuri da lungatgs. Tuttina regia in’atmosfera pascheivla. Ei vegn salidau, segidau e magari filau novs contacts. Pigl auter vala la regla: viver e schar viver e semplamein guder las vacanzas.

Ei para, sco sche nus vivessan en in auter mund. Lunsch naven dalla realitad, senza carplinas, sescagnems e demonstraziuns da pussonza. Semplamein ina cuminonza da campaders che ha schau ses quitaus casa.

E lu suonda in punct culminont. La messa dalla dumengia ella baselgia parochiala. Jeu sun gia stada en differentas grondas ed impurtontas baselgias. Quei senn da cuminonza sco cheu hai buca sentiu zanu’auter. Cuort avon messa sempleina la baselgia sil pli davos plaz. Indigens e jasters sentaupan per festivar survetsch divin. Biars stattan perfin sin peis ed en schanuglias sin la crappa dil plantschiu. Buca che la baselgia fuss aparti biala ni che l’orgla resunass solem. Gie, jeu capeschel buca bia dapli ch’igl amen. L’atmosfera ei quei che commuenta. Crer ei per mei buca ina caussa dil tgau, mobein ina caussa dil cor. Nus jasters seschein purtar dallas canzuns cantadas en croat. Mintgaton cun melodias enconuschentas. Cantadas cun perschuasiun ed en tutta pietusadad. Cant che drova negin accumpignament all’orgla. Cant che muenta e colligia. Colligia pign e grond, giuven e vegl, jester ed indigen ed il plaid «mir s rama» – la pasch cun tei – plaida per sesez.

Unics e tuttina uni in cun l’auter.

RTR Pled sin via 08:45

Artitgels legids il pli savens

Scrollar a sanestra Scrollar a dretga