Per mei dat ei nuot pli bi che la damaun marvegl. Scher en letg. Tut ei ruasseivel. E mo il cantinem dils utschals ei d’udir.
En quels muments hai jeu magari las meglieras ideas e sai tancar l’energia pil di.
In da quels dis, tut spontan, ei la canzun da scoletta vegnida endamen a mi:
Ureglias miur havess bugen, lu mass jeu sin la prada e forsa udess il schemer dalla natira che pitescha da nossa cumadeivladad.
Ureglias miur havess bugen, / lu mass jeu sin la prada. / Tedlass bugen per in mument, / co la natira flada.
Ruasseivel e mo la natira ei d’udir – tgisà tgei ch’ella vul dir a mi?
Arva tes egls e sesmarveglia da tut quei ch’ei scaffiu! Vesas las bialas fluras sil prau. Ellas paradeschan en tuttas colurs. Ellas ni lavuran ni filan e negin ei vestgius aschi bein sco ellas.
Audas las ramurs dils uauls, il cant dils utschals, il vent ed il dagutar dalla plievgia.
Sentas ti il bien fried dallas jarvas che creschan en iert e sil prau. Tgei deletg da gustar tut ils fretgs dallas plontas e legums da nos orts.
Ureglias miur havess bugen, lu mass jeu sin la prada e forsa udess il schemer dalla natira che pitescha da nossa cumadeivladad.
Ella ei in grond scazi, nossa natira – mo essan nus pertscharts che nus vein quei scazi mo ad emprest – ella ei buca nies possess.
Pia pren in mument peda, ei sto buca gest esser la damaun marvegl e gauda tut quiet la canzun da nossa natira.