L’eivna passada la bunura al lai da Segl. Las chasas vidvart, a Plaun da Lej, glüschan albas aint il sulai, süls ots amo ün pa naiv chi fa star la muntagna amo plü ota co ch’ella es, ed ils larschs gelgs sun sco flammas, ardan gualiv sü. Il lai sta tuot salda, gnanc’ün pitschen movimaint da l’aua, ingüna barcha nun es da verer. Eu guard – ed a mai vain adimmaint ün vers d’üna poesia da Jon Guidon, il poet da la Val Müstair:
Tuot commossdal bel aspet eu sune’m fermandeu guard in devoziun,co cha Dieubenign charezzachasa, prövi e granezza.I’s stuvess esser ün crap per brich esser commoss da tuot quai cha la natüra ans spordscha in quists dis.
Guarda co chi va a fin ün di, a fin ün an, a fin üna vita.
Vers saira lura a listess lö. Quasü las muntagnas glüschan amo i’l sulai. Suotvart esa fingià ün pa s-chür, chasas nu’s poja plü differenzchar. I va vers la not. Üna quietezza totala malgrà il schuschurar da las uondas chi battan lur tact, sainza as fermar ün mumaint.
Id es ün oter discuors – mattina o saira. Scha la mattina m’ha dit: Guarda quant bê cha’l muond as preschainta, va landervia, t’allegra, es uossa la taimpra ün’otra: Guarda co chi va a fin ün di, a fin ün an, a fin üna vita. E quai gnanca zich in üna melanconia bod depressiva, plütost in ün’acceptanza amiaivla chi inclegia il sflurir e svanir precis uschè armonic sco’l crescher e’l flurir.
Eir in quel mumaint am paraiva impussibel da brich sentir l’atmosfera dal mumaint, da brich sentir che cha quist mumaint cuostaivel am disch. La natüra nu discuorra, ella basta a sai svess, ma ella svaglia in nus ün discuors e’ns po manar suroura a nos viver e pensar solit e quotidian.
Quai ha express avant daplü co dua milli ans ün sabi dal vegl testamaint cur ch’el ha scrit ün pêr versets chi sun sco üna poesia:
Nascher ha seis temp,e murir ha seis temp,implantar ha seis temp,e sragischar ha seis temp,mazzar ha seis temp,e guarir ha seis temp,sbodar ha seis temp,e bear ha seis temp,cridar ha seis temp,e rier ha seis temp,plandscher ha seis temp,e sotar ha seis temp.
Ed eu pudess agiundscher hoz: Sabi quel chi taidla ed observa che temp chi’d es.