(surmiran) Respeira e suonda cun l’attenziun agl ties flo. Ta metta avant, tg’igls ties pansiers èn scu neivlas. Els vignan, ma von er puspe. Lascha els an muvimaint.
Meditaziun u er joga dessan sustigneir nous per esser pi preschaint. Chegl è en trend tgi adegna da ples suondan. Cunzont an las religiuns Asiatas, è igl veiver aint igl preschaint, la fegnameira dalla veta. Per esser sincera tunga chegl fitg attractiv. Sa focussar sen chegl tgi capeta ossa e tras chegl veiver ena veta sainza chitos. Sen l’oter mang fògl er en po tema. Noua fissan nous carstgangs schi tots vivessan angal aint igl preschaint? Cler tematicas scu discriminaziun fissan alloura pi pac en tema.
Ia pains pero er allas bleras tgossas grondiousas tg’èn neidas creadas, perchegl tgi la gliout veva ena visiun, ena visiun futuristica. È chegl alloura er anc veiver aint igl preschaint?
Ma tge fo chegl cun la generaziun nova, sch’els veian nous carschias adegna a far dus tgossas a leda?
Ia dung tiers, er ia sung fascinada digl sentimaint tg’am circumdat sch’ia va medito u fatg joga. Ena dumonda am lascha pero betg libra: pertge tschartgainsa tottanegna chegl sentimaint d’esser preschaint? Vainsa mengia bler taimp danvanz, è chegl simplamaintg ena nova moda u è igl mintga de da nous mengia pac preschaint?
Far dus tgossas igl madem mument, para oz gio tot normal. Ia manetg, tgi vo cun auto e tedla dantant betg radio? Cant savens tschantainsa la seira davant la televisiun e raspundagn dantant anc messadis segl telefonign?
Ègl chegl igl gro per igl basign da joga e meditaziun scu meds d’ageid? Blers da nous on gio fadeia da sa tschantar ensanouas e spitgier sen ensatgi u ensatge, sainza piglier or igl telefonign e far lo diversas tgossas.
Sch’ia pains a mia unfanza, deis aint e deis or saveva star an tgombra e m`occupar cun en puzzle da 1000 tocs. Vurdar televisiun era en evenimaint, schi te levas vurdar ensatge vevas chel mument, da seser ed esser attent. Schiglio erigl passo e davent. Oz vainsa betg ple chel squitsch. Te eras betg attent? Eneda struclar segl battung digl gaffen e gio sa repeta la scena.
Ma tge fo chegl cun la generaziun nova, sch’els veian nous carschias adegna a far dus tgossas a leda? Nous stuagn esser realistics, ins amprenda cun imitar, schi nous igls vivagn avant chel multitasking adegna e dapertot, alloura stuagnsa betg esser stupias tgi fon siva.
Ma, mattagn vogl er cò betg pigl sforz da la perfecziun, mabagn per simplamaintg esser cunsciaint digl tema. Uscheia az saia er betg dar la rasposta finala ma an mintga cassa vaia scretg chel text, cun la saveida tg’ia sung stada en mument tot preschainta, ia va vivia igl mument.