Siglir tar il cuntegn

Header

audio
Pled sin via
Or da Vita e cretta dals 13.04.2022.
laschar ir. Durada: 2 minutas 58 Secundas.
cuntegn

Pled sin via Venderdi sonch – Pasqua, mort e vita

I dà bod adüna üna guerra inglur sül muond, ma no d’eiran adüsats da registrar quai e d’invlidar o metter dvart quai. Pel solit ter lönch davent, pel solit nun ans ha quai tocs in nossa vita quotidiana. Uossa es quai oter, la guerra es bod davant chasa, ils fügitivs rivan in noss cumüns, umans chi vivan in maniera sumgliainta sco no, ils purtrets muossan citads desdrüttas, citads sco las nossas. No eschan observatuors, vezzain las destrucziuns, vezzain la violenza, il patir, la disperaziun, pudain sentir cun las duonnas e’ls uffants che cha quai sto esser, laschar in üna vita dal tuot intscherta a baps ed homens. E che pudaina far? Plondscher, exprimer nossa simpatia, blastemmar, taschair e disperar. Id es propcha Venderdi sonch e no eschan cundannats sco las duonnas suot la crusch a verer, brich incleger o sco’ls scolars da Gesu: Mütschir e serrar ils ögls. Venderdi sonch!

Ma almain laschar tunar ils sains als haja fat bain.
Autur: Johannes Flury Anteriur rectur da la Scol'auta da pedagogia dal Grischun

Cugnuoschaivat vo Schuders? Ün cumünet ot sur Aschera, Schiers, ün pêr chasas, bundant 40 abitants ed üna baselgina, famusa per seis tet da s-chandellas. Tuot es stip a Schuders, la prada, la via da Schiers sü, la senda giò vers la baselgia. Ün cumünet giò’d via.

Eu n’ha survgni d’incuort ün filmin chi muossa duos duonnas da Schuders in baselgia, minchüna tira la sua e fa sunar il sain, las suas pendan nempe aint immez la baselgia e sunar as stoja amo a man. Las duos duonnas fan quai fich seriusamaing e davo dischna amo ün pêr frasas: Co ch’ellas as saintan sco observaturas chi nun pon far nüglia per frenar e stoppar la violenza. Ma almain laschar tunar ils sains als haja fat bain. Verer quist filmin, las duos duonnas, chi expriman cun ils tuns da la sunasoncha l’aröv per pasch, per la fin da l’aggressiun, per üna vita sainza violenza, quai d’eira vezzond quella jada ed es amo hoz üna sbrinzla da Pasqua. La vita es ferma sco la mort, la spranza sco la disperaziun. Pasqua!

RTR Pled sin via 08:45

Artitgels legids il pli savens

Scrollar a sanestra Scrollar a dretga