Siglir tar il cuntegn

Header

audio
Pled sin via d'Anja Felix-Candrian
Or da Vita e cretta dals 07.04.2023. Maletg: RTR
laschar ir. Durada: 3 minutas.
cuntegn

Pled sin via Venderdi sontg «Mirar e prender a cor»

(sursilvan) «Il pievel steva e mirava.» – Jesus vegn sentenziaus alla mort, mess vid la crusch e miera. E la glieud stat leu e mira. Aschia descriva Lucas en siu evangeli la rolla dil pievel. Entgins fan beffas e greschan nauschs plaids, auters ein semplamein leu e miran, damaneivel ni dalunsch.

Jeu stun era cheu e mirel. Mirel novitads, teidlel podcasts, scrolel mintgaton il tgau ni sevilel, sai buca capir, tgei che schabegia sil mund ni tier nus en Svizra. Daco mirel jeu insumma? Jeu sesentel silsuenter buca meglier. Quei mirar tier e tuttina saver far nuot para zaco falliu. E mi’atgna carga daventa era buca pli leva.

El ha anflau pasch e libertad. Cun perdunar, schar liber la gretta e sefidar.
Autur: Anja Felix-Candrian Plevonessa refurmada

Da Venderdis sogn ein biars serimnai e miran. Quei che schabegia cun Jesus ei terribel ed el medem mument era fascinont. Negin sa volver naven l’egliada. Suenter la mort da Jesus dat ei denton ina midada. Quels che vevan observau quels eveniments semettan sin via a casa e petgan adina puspei sin lur pèz. Cun pitgar sil cor muossan els ch’els stattan mal e sesentan culpeivels. Els han viu zatgei ch’ei iu a cor. Han els sentiu che Dieus ei staus leu denter els?

Atgnamein mirassen nus pli bugen naven. Mo era nus essan pertuccai. Ei dat adina puspei malgiustia e crisas. Mintgaton curclein nus nos deficits cun far beffas. Ni ch’ils plaids mauncan.

Tgei di Jesus? – Els evangelis savein nus leger siat plaids che Jesus hagi detg alla fin vid la crusch. Tenor Lucas fa Jesus in’oraziun. El ura: «Bab, perduna ad els, pertgei els san buca tgei ch’els fan.» Pli tard miera Jesus culs plaids: «Bab, en tes mauns surdun jeu miu spért.» El ha anflau pasch e libertad. Cun perdunar, schar liber la gretta e sefidar.

Ed jeu stun cheu e vesel che jeu sun aunc lunsch naven da quella via. Mo ei dat aunc bia plaids che muossan ina buna direcziun. Plaids da persunas che consoleschan. Da persunas che protesteschan. Ei dat tons che miran buca naven, che tegnan la dira e crein el bien. Lur vuschs van a cor e dattan curascha.

RTR 08:45 Pled sin via

Artitgels legids il pli savens