Pled sin via - «Zerclar ni schar star»

(sursilvan) Nus vein entschiet in niev meins, il meins da zercladur. Siu num dat l’impressiun ch’ei fuss da zerclar mo duront quels 30 gis e schar crescher il rest digl onn tut sco ei vul. Secapescha, tgi che ha iert sa bein avunda che gliez ei buc dispet la megliera idea. Con spert prendess il zerclem surmaun!

Interessantamein porscha igl evangeli tenor Mattiu in auter cussegl (cf. Mt 13,24–30). En ina semeglia per il reginavel da tschiel vegn ei descret che salin e zerclem creschien enina sigl èr. Perquei damondan ils survients lur patrun: «Has ti buca semnau bien sem en tiu èr? Danunder deriva pomai il zerclem?» (Mt 13,27).

Gie, quella damonda resuna franc aunc oz: Danunder deriva adina puspei il zerclem? Ella semeglia setracta ei tier la salin e quei zerclem da carstgauns. E perquei ei la proxima damonda dils survients pli brisanta: «Duein nus forsa ir e rimnar il zerclem?» (Mt 13,28) – pia, far fin cul zerclem. Mo la damonda vegn rispundida cun in «na».

Sche nus vein pia en nossas cuminonzas ni en nies contuorn carstgauns che paran a nus sco ina sort zerclem da cardientscha, lu vein nus tuttavia buc da vuler ir e strer ora quels. Na, salin e zerclem duein omisdus saver crescher e pér il gi dalla raccolta vegn il patrun sez a s’occupar dalla caussa. Nus vein pia buc da giudicar sur da nos concarstgauns.

Con savens funcziunescha ei auter? Gest era sche nus patertgein vid ils 500 onns dapi la reformaziun, vesein nus cheu immensas reproschas e suspecziuns vicendeivlas. Ed oz en ina societad che vul esser toleranta, vegn ei giudicau in sur da l’auter ch’ei tut strembla. Mo quei ei buc la tenuta che la semeglia dil reginavel da tschiel dat a nus.

Jeu manegel che nus stuein calar cun quei giudichem e quella sabiuttadad, era nus sco baselgias. Nus essan clamai da dar sin las pli differentas modas perdetga dil Diu vivent ed era dad entrar en discussiuns captivontas surlunder. Mo il giudicar, gliez ei definitivamein caussa dil patrun!