Sin il flyer da l’operetta vesan ins duas chauras cun guants da boxar sin il chau. Ils animals guardan cun in rir en la camera. E las cornas che dattan il num al teater vesan ins era – «Quatter cornas per in alleluia». Al teater cun musica vegn giugà l’opera «Rita» da Donizetti, cumbinà cun auters stils da musica sco per exempel Grönemeyer, Schumann, Wagner e chanzuns rumantschas.
Il text e la reschia vegn dad Ivo Bärtsch e la musica è vegnida arranschada da Duri Collenberg. Giugà e chantà vegn en tut las trais linguas chantunalas – rumantsch, tudestg e talian. En tut èn 10 persunas activas: L’ustiera Rita che vegn giugada da Gianna Lunardi, ses dus umens Gasparo che vegn giugà da Chasper Mani e Beppe da Daniel Bentz. Els ed ella chantan e giogan teater. Vitiers èn sis musicists e musicistas sin il palc.
-
Bild 1 von 4. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
L’operetta Ardez ha la finamira da preschentar mintga dus enfin trais onns in’opera cun divers geners. Per exempel musica populara, chanzuns localas e surtut na possia il connex cun la lingua rumantscha betg mancar. «L’operetta giò’n Plazzetta» gioga normalmain en lieus spezials, sco per exempel sin la Plazzetta ad Ardez – ina plazza cun in bigl, senza traffic e circumdà cun chasas engiadinaisas. L’emprima producziun han els fatg durant la stad 2015, la secunda da l’onn 2018. La terza ediziun è vegnida da l’onn 2021 en co-producziun cun Opera Engiadina. Ed uss, il 2023, è l’operetta Ardez da viadi en ils suandants lieus:
- Gievgia ils 14 da settember è la premiera stada en il Zuoz Globe.
- Venderdi ils 15 da settember ha l’operetta giugà ina segunda giada a Zuoz.
- Gievgia ils 21 da settember en l’aula da l’institut Otalpin a Ftan.
- Venderdi ils 29 da settember a las 20:00 en la Postremise a Cuira.
- Sonda ils 7 d'october per la davosa giada a Boswil.