«Quel temp n’aveva in uffant betg da dir bler», scriva Antonetta (Netta) Battaglia-Janutin en ses cudesch «Ein Goldesel wäre mir lieber gewesen». D’uffant è ella vegnida mulestada sexualmain d’in pur pedofil. Raquintà n’ha ella quai alura a nagin. «Nossas retegnientschas eran memia grondas da discurrer da tals temas cun noss geniturs», cuntinuescha il raquint – e cartì n’avess probablamain nagin ad ella.
En ses cudesch ha l’autura entant mess a scrit quella sco er autras episodas da sia uffanza a Riom che demussan la vulnerabladad da mattatschas durant ils onns suenter la guerra. Igl è «la lavur permanenta, l’obedientscha, l’autoritad clericala e la scola» che dattan la tempra a l’uffanza da quels onns, constatescha la manadra da l’Archiv da cultura da dunnas dal Grischun Silke Margherita Redolfi en sia introducziun al nov cudesch.
Ina giuvna che sa dosta
Antonetta Battaglia-Janutin che abita oz a Seglias n’ha dentant betg tolerà tut. «Jau sun ma dustada» - saja quai, cura ch’in magister ha maltractà ina conscolara, u avant sias nozzas cun ses um trapassà Gioni Battaglia, in protestant. Ina tala maridaglia saja in putgà mortal, ha in pader chaputschin ditg a la giuvna catolica da 19 onns ch’era alura en speranza. «Nus educain quest uffant en la Baselgia catolica ed al dain a las soras a Glion», haja il chaputschin pretendì.
Malgrà il scumond clerical han Gioni ed Antonetta maridà en la baselgia da Lai il 1. d’october 1960, raquinta l'autura en ses cudesch. E sa chapescha han els era tegnì lur figlia. Pli tard è la famiglia creschida a quatter uffants.