Creschida si è Anna Mengiardi ad Ardez en Engiadina Bassa. Uss viva e lavura ella ad Ins, in vitg tranter Berna e Neuchatêl. In zichel sco ina randulina sa senta ella schon, di Anna Mengiardi. Ma ad Ins ha ella chattà in’insla per sai.
Ella viva en in vitg en il vitg. En 20 chasas d’ina fundaziun vivan artists ed artistas, pedagogas ed artisans che han furmà ina cuminanza libra, mintgin e mintgina cun ses project. Anna Mengiardi ha avert ina scola alternativa inspirada da la filosofia da Rudolf Steiner e lavura là cun corp ed orma sco mussadra. Ad Ins sez è ella vegnida tras il teater, vul dir ses temp sco actura en la cumpagnia Stradini cun quala ella è stada trais stads en viadi sco nomada artistica. «Jau viv schon in pau en ina bubble qua», di Anna Mengiardi, «ina bubble che fa bain.»
Nus giain en quest Profil a spass cun Anna Mengiardi tras «si’insla» ad Ins e tras differentas staziuns biograficas.
1 / 4
Legenda:
Il dom u la cuppla, uschè numnan ils abitants dal “vitg en il vitg” questa construcziun che sa rechatta en in parc. L’acustica è fantastica en quest spazzi.
RTR, Anna Serarda Capell
2 / 4
Legenda:
Anna Mengiardi sa chatta adina puspè cun amias per ballar en quest spazzi da teater ad Ins. Sia lavur tar la cumpagnia Stradini ha purtà ella en questa cuminanza dad artistas, mansterans e pedagogas – qua ha ella chattà “si’insla”.
RTR, Anna Serarda Campell
3 / 4
Legenda:
En questa chasa da scola ha Anna Mengiardi fabritgà si sia scolina alternativa, inspirada da la pedagogia da Rudolf Steiner. La chasa è circundada da natira ed è fabritgada cun set differents lains. Dapertut vi da la chasa sa chatta era segns magics ed avis sin l’astrologia.
RTR, Anna Serarda Campell
4 / 4
Legenda:
Entant han ils uffants anc vacanzas da stad e Anna Mengiardi è suletta en sia stanza da scolina. Là ha ella cumenzà avant paucs onns cun be 2 uffants, uss ha ella 10 uffants che visitan sia scolina ad Ins. La filosofia è: “Emprender cun far e betg tras declerar.”
RTR, Anna Serarda Campell
