Lara Glisenti è creschida si en in pitschen vitg en l’Engiadina, «nus avevan tut las libertads». Ma ella vuleva adina savair tge ch'è da tschella vart dal flum (Valember). Ir tras la vita sco ina scolara, quai è in dals princips da Lara Glisenti. En scola sez però era tut memia stretg e stinà per ella.
Jau hai fatg il vadè – uschè ferm fin ch'jau sun vegnida bittada or da scola, or dal sistem.
Quai saja er stà ina sort scola, uschia guarda ella enavos oz sin quels dis muventads. Dali 6 onns viva l'Engiadinasa a New York. Là ha ella frequentà la scola d’acturas la pli enconuschenta dal mund «The Lee Strasberg Conservatory». Ma er en il mund da teater n’è ella betg pronta da far cumpromiss, «jau na faschess betg reclama per in product che na ma persvada betg». Tge che quai vul dir per sia carriera sco actura e pertge che sia statura è adina puspè in tema, udis en quest Profil. A New York ha ella chattà sia grond’amur e ses nov dachasa ad East Harlem. Là è ella la princessa dal bloc e cun ses um afroamerican è ella sfundrada en «l’auter America», en la Black culture cun sia bellezza, musica, istorgia, e las difficultads en il mintgadi.
La colonisaziun cuntinuescha fin il di dad oz, e quai fa mal.
