Il ballape gioga ina rolla centrala en la vita dad Eder Lala. Il num Eder ha el survegnì suenter in anteriur giugader da la naziunala da la Brasilia. Sez ha el er giugà blers onns ballape, a la da sia carriera fin 10 onns tar il CB Domat ch'el trenescha uss dapi duas stagiuns.
Grazia al ballape ha Lala dentant er pudì s’integrar bain en il Grischun suenter la fugia da sia famiglia ord l’Albania il 1991. Ed il ballape ha er gidà a surmuntar la mort nunspetgada da sia mamma. Oz ha Eder Lala sez famiglia e dapi bun set onns maina el il center da fitness a Tusaun.
Grevas fridas durant l’uffanza
Cun otg onns è el stà sin la fugia, curt suenter ha el pers la mamma. Ils emprims onns da la vita d’Eder Lala èn stads turbulents. Il 1991, cura ch'el aveva otg onns, ha sia famiglia fatg satg e pac e bandunà la patria, l’Albania, quai pervia dal caos politic, la miseria economica e l’auta dischoccupaziun.
Mia mamma ha dà sia vita per che mia sora ed jau pudain cuntinuar cun ina bella vita qua en Svizra.
Fin il 1990 è l’Albania daventada sut il dictatur Enver Hoxha in dals reschims ils pli stricts en l’Europa – isolaziun totala. Pir il 1990 cura ch'il sistem è vegnì cupitgà sut squitsch da la paupra populaziun, hai dà via libra per la democrazia. Malgrà blers e gronds problems era ils onns suenter, ha il pajais pudì far il pass ord la crisa. Oz è l’Albania ina destinaziun turistica che vegn adina pli attractiva.
Per mia sora e per mai è la fugia ord l’Albania stada ina tscherta aventura, franc auter che per mes geniturs.
Per pudair porscher a la famiglia ina meglra vita ha cunzunt la mamma vulì bandunar il pajais. I ha cumenzà ina vita ord la valischa, quai d'in d’albiert d’asil a l'auter. La finala è la famiglia sa chasada a Danis. Strusch sa vivids en hai dà la proxima frida. La mamma Mira mora suenter in’operaziun ch’ha manà ad in cas giuridic. Sis onns pli tard ha la dretgira declerà culpant l’ospital. Durant quest temp han Eder Lala e sia sora Juna ch’è dus onns pli veglia, ma er il bab Lorenc survegnì grond sustegn a Danis. Star si, far pasch e guardar enavant – quai è stà la devisa. Dapi 18 onns è Eder Lala uss maridà, el ha sez famiglia, è bab da duas figlias (10 e 15 onns) e viva ina vita ventiraivla en il Grischun. Ses bab ha era chattà in nova vita a Glion. El è maridà ina segunda giada ed ha anc ina giada survegnì dus uffants.
Eder – il num dal giugader brasilian Éder Aleixo de Assis
Ses num Eder ha il bab Lorenc dà ad el. Lorenc Lala, dapi blers onns scolast da sport a Glion, è adina stà in grond fan da l’equipa naziunala da ballape da la Brasilia. Suenter la naschientscha da ses figl aveva el ina glista cun trais nums. Dasper Eder, fissan anc vegnids en dumonda Falcão e Rivelino. La finala è Lorenc sa decidì per Eder, il pli simpel e pli pauc cumplitgà. Eder Aleixo de Assis era attatgader ed ha giugà 54 gieus per l’equipa naziunala brasiliana tranter il 1979 ed il 1986.
Il ballape è vegnì mess en tgina ad Eder Lala. Uschia ha el, sco il bab, anteriur giugader e trenader, cumenzà gia baud a dar ballape. Suenter avair chattà in nov dachasa a Danis en Surselva ha Lala dà ils emprims onns tar l’US Schluein Glion. Gist durant quels onn ha il ballape er gidà da s’integrar en la nova vita en Svizra.
Tar il duel Svizra – Albania hai jau propi in grond dilemma, quai èn emoziuns ch’ins na po betg descriver.
Pli tard ha Eder Lala midà a Cuira nua ch’el ha tranter auter er giugà ensemen cun Senad Lulić ch’è pli tard daventà profi e ch’ha tranter auter giugà 10 onns tar Lazio Roma ed er bunamain tants onns per l’equipa naziunala da la Bosnia-Erzegovina. Suenter in curt intermezzo a Bogn Ragaz ha Lala midà a Domat nua ch’el ha giugà bun 10 onns. A Domat è el adina sa sentì bain ed il CB Domat è uschia daventà ses club dal cor. Dapi dus onns ha Eder Lala surpiglià a Domat il post da schef-trenader da l’emprima equipa ch’era vegnida trenada avant 14 onns da Walter Frizzoni. La stagiun passada è il CB Domat, sut la batgetta d’Eder Lala, però vegnì relegà da la segunda en la terza liga regiunala.