Profil - Giuanna Caviezel : La «Miss Rumantsch» da la Confederaziun - Cultura

Ella è responsabla per la versiun rumantscha dad ina da las publicaziuns las pli enconuschentas e derasadas da la Svizra: Giuanna Caviezel (29) è la manadra dal Post da translaziun rumantsch da la Confederaziun, e tar sias incumbensas tutga er il cudeschet da votaziun cotschen. Ins pudess perfin dir ch'ella saja la «Miss Rumantscha» da la Confederaziun.

Giuanna Caviezel sin il canapé en stiva da sia abitaziun a Berna.

L'amur per ils linguatgs ha la dunna da Vrin scuvrì durant ses temp a la Scola chantunala a Cuira. Il mument emprenda ella norvegiais, quai per pudair ademplir in di ses siemi d'abitar u almain da far in lung viadi tras il pajais scandinav. Ella è persvasa che mo cun pudair discurrer il linguatg dals indigens possian ins propi vegnir en contact cun ina cultura estra.

Il 1976 ha il Parlament federal approvà la lescha federala davart ils dretgs politics. Dapi lura sto il Cussegl federal declerar en ina broschura a las votantas ed als votants davart tge ch’i vegn decidì en las votaziuns. Dapi il 1977 tutga il cudeschet da votaziun tar mintga votaziun dal pievel. Da colur cotschna è il cudeschet pir dapi l’onn 2004.

Tenor la Chanzlia federala edescha la Confederaziun il mument tar mintga votaziun bunamain 6 milliuns cudeschets da votaziun cotschens. 4,2 miu. per tudestg, 1,4 miu. per franzos, 300’000 exemplars per talian e 16’000 exemplars per rumantsch grischun.

La versiun rumantscha vegn translatada dal servetsch da translaziun da la Chanzlia chantunala dal Grischun. Responsabla per la controlla da qualitad e la publicaziun noda dentant la manadra ni il manader dal post da translaziun rumantsch da la Confederaziun. Dapi il 2017 ès quai Giuanna Caviezel.