En sasez fiss el gugent daventà ortulan, la natira cun tut sia flora e fauna ha adina fascinà il Sursilvan ch'è creschì si a Sagogn. Sur il studi da veterinari è el alura sa tschentà en la perscrutaziun da parasits nua ch'el è sa spezialisà sin il verm plat da vulp, il uschenumnà «Fuchsbandwurm». Sper sia lavur scientifica ha el era manà l'institut per parasitologia a Turitg, è stà professer ed è vegnì onurà per sia lavur da perscrutaziun sco era per sia lavur sco docent cun differents premis.
En sasez fiss jau gugent daventà ortulan.
La fin da schaner ha l'um da 65 onns prendì cumià da ses institut e sias studentas ed è uss dapli en Frantscha nua ch'el sa deditgescha pli intensivamain a sia chasa da purs e ses iert. Qua sappia el esser ortulan e far lavurs manualas en ses pitschen microcosmos, dentant massa fitg eremit na vulessia el tuttina betg esser.
Art e perscrutaziun han insatge communabel, per omadus ston ins esser creativs.
Ussa sa legria el sin far viadis e giudair anc dapli era l'art. Perquai era cun l'art e la pictura ha il bab da dus uffants creschids ina gronda affinitad. Ses figl Andriu ha artà questa avaina e viva oz da l'art e sia figlia Barla ha giugà in temp sco ballapedista professiunala tar il FCZ.
