Profil - Rumantschs e Rumantschas che vivan en l'Italia

Rumantschas e Rumantschs na datti betg be en la Rumantschia, mabain els dat i in pau dapertut sin quest mund. Prisca Bigliel è puspè durant la stad sin visita tar intgins cumpatriots e cumpatriotas ch'han chattà lur nov dachasa ordvart la Svizra. Suenter l'Europa dal Ost la stad passad, visita ella questa stad exclusivamain l'Italia e ha contactà sis persunas en tschintg differentas citads.

1. visita: Udine tar Lisa Falkenstein

«Amore» è il motiv perquai che la Jaura viva uss dapi 26 onns a S.Maria la Longa, in pitschen vitg datiers dad Udine. Ses «Gabriele» ha la dunna da 57 onns emprendì d'enconuscher da sias uras sin il cunfin a Müstair.

L'anteriur «carabinieri» lavurava sin cunfin e la bella dunna cun chavels blonds en la drogaria sin cunfin. Malgrà ch'il talian da Lisa era – sco ella di – a l'entschatta miserabel, han lur egliadas e sentiments tanschì per sa chattar.

Ed era sch'els èn returnads en la patria da Gabriele è il liom cun la Val Müstair anc adina fitg ferm.

Lur dus uffants Nicolas (31) e Selina (23) discurran, respectiv «tavellan», tuts dus cun gronda superbia «Jauer». Ed era Gabriele ha emprendì, grazia a sia lingua materna, il Furlan, svelt la lingua da sia dunna.

Momenti ad Udine

2. visita: Venezia tar Luis Bischoff

«Amore» è era il motiv ch'ha manà l'Engiadinais da Lavin a Venezia e quai tras sia partenaria Laura, ch'ha collavurà durant ses studi cun in'artista da vaider da Venezia.

Ed uschia èn els dus restads en questa citad, emprim sco pèrin e dapi tschintg onns era sco geniturs da Camill (4 ) ed Alberta (1).

Entant che sia dunna lavura oz per il consulat svizzer a Venezia, pendulescha l'um da 43 onns regularmain sco architect d'interiurs e scenograf tranter Venezia e la Svizra.

Momenti a Venezia

3. visita: Vetralla tar Flurin Isenring

«Arte» dal «renascimiento» e Leonardo da Vinci è il motiv perquai ch'il giuven Flurin è da sias uras en la vegliadetgna da 18 onns ì da Laax a Firenza per studegiar art.

Dentant Firenza n'ha betg tutgà l'olma dal giuven Sursilvan, tut saja stà fitg reservà e steric, uschia ch'el haja midà a Roma e chattà là tut in'autra energia ed avertadad. El di da sasez: «Per mai n'hai mai dà insatge auter ch'il art.»

Oz ha il figl da l'enconuschenta artista Toja Isenring-Maissen 73 onns e viva ordvart Roma amez la natira sin ina collina en ina gronda chasa nua ch'el s'occupescha anc adina mintga di cun ses art.

momenti a Vetralla

Sias ovras

4. visita: Roma tar Simona Caminada e Curdin Vincenz

Ella va ed el vegn. Durant ils davos 4 onns ha Simona Caminada rapportà da l'Italia sco correspondenta per SRF. Uss turna la Sursilvana a Cuira ed è a partir da settember la nova directura da RTR.

Per Curdin Vincenz daventa in siemi realitad cun il post da correspondent a Roma. Suenter varga 30 onns lavur schurnalistica en las pli differentas funcziuns e redacziuns vegn l'um da 52 onns, ch'è burgais da Mustér, a rapportar ils proxims 4 onns da l'Italia.

Gist uss è la surdada tranter ils dus Rumantschs, vul dir, i vala da survegnir ina survista, da savair ils process da lavur ed enconuscher ils pli impurtants contacts. Simona Caminada di: «Jau hai duvrà in onn da vegnir en en quest job da correspondenta.»

lieu da producziun a Roma

5.visita: Roseto / Pescara tar .....