Analisar, sviluppar e vender sajan sias fermezzas, di l'interprendider da Trun che ha fundà gia cun 24 onns sia emprima atgna firma d'immobiglias a Cuira. El era il prototip da l'um da fatschenta ambizius e dinamic che ha adina patratgà à la gronda ed era gughegià insatge – era cun il risico da crudar sin il nas.
Na entschaiva mai da chalar e na chala mai d'entschaiver – è mes motto da viver.
Avant 30 onns ha el fatg la midada dal Grischun a Turitg e midà dal sectur d'immobiglias en las pli differentas branschas da l'economia. Iniziar, sviluppar, lantschar ina fatschenta, per alura puspè vender ella – uschia funcziunia el.
Jau sun plitost il tip strategic che quel da l'operativa.
Il project ch'accumpogna el il pli ditg è la «Giesserei Oerlikon» – in'anteriura fabrica ch'el ha midà avant 25 onns en in local da gastronomia ed events. L'auter onn festivescha il Sursilvan ses 60avel anniversari e sch'i va tenor ses plan vegn quel festivà a Havanna. Cuba saja daventà per el sco in segund da chasa, qua vuless el en il futur era passentar dapli temp per sa recrear e natiralmain era per far l'ina u l'autra fatschenta.
