Ella è musicista da professiun e viva a Rorschach al Lai da Constanza. Ses instrument è il cuntrabass. Ma tgi che patratga ussa vida Ländler e Schottisch è cumplet sin la faussa via. Adelina Filli è ina virtuosa dal jazz.
Legenda:
Betg 'mo' cuntrabass – Adelina Filli porscha en ses atelier a Rorschach terapias ed experientschas da musica e tuttas sorts instruments.
RTR Adrian Camartin
Gist per musicistas e musicists è l’onn passà stà ina gronda sfida. Bleras occurrenzas èn vegnidas annulladas, curs e workshops n’han pervia da las mesiras da protecziun betg pudì avair lieu. Adelina Filli, ch’è creschida si a Schlarigna, vesa en quai temp dentant era ina schanza. Persunal sco era per l’entira societad.
En il Profil raquinta ella da sia via crappusa tar sasezza e davart la musica grazia la quala ella po exprimer ses sentiments ed uschia entrar en contact cun blera glieud.